DILI (TOP) – Durante ne’e mosu pro-kontra kona-bá asaun governu nian liu husi Ministériu Justisa ne’ebé atu altera Kodigu Penal Timor-Leste hodi krimaniliza defamasaun, maibé to’o oras ne’e Prezidente Repúblika, Francisco Guterres Lú Olo sei “taka ibun” hela ba assuntu ne’e.
Sorumutu entre Organizasaun Naun-Govermental (ONG) La’o Hamutuk ho Prezidente Lú Olo diskuti assuntu barak inklui planu governu nian atu kriminaliza defamasaun ne’e rasik.
“Maibe husi Prezidente Repúblika rasik la kohi fó Komentáriu ba lei kriminalizasanu defamasaun ne'ebé Ministériu Justisa durante ne’e ezbosu hela, tanba lei kriminilizasaun defamasaun sidauk iha Prioridade,” hateten portavoz NGO La'o Hamutuk, Celestinho Gusmão ba jornalista sira iha Palásiu Prezidensiál Ai-Tarak Laran, Dili Tersa 11 Agustu 2020.
"Ohin ami enkontru ho Prezidente Repúlika atu informa ita hotu nia preokupasaun kona-ba proposta lei kriminilizasaun defamasaun, no liberdade espresaun nian, maibé govenante sira hatete ba Prezidente Repúlika katak, inisiativu ida ne'e la'os prioridade governu nian, ho ida ne'e ami mós fó hatete ba Prezidente Repúblika katak, ne'e sai hanesan oportunidade di'ak ida ba ita hotu atu bele diskuti lei ida ne'e, maibé Prezidente Repúblika lakohi halo komentáriu," afirma Celestinho.
Nia hatutan, Prezidente Lú Olo ohin halo komentariu de'it kona-ba edukasaun nian ba sosiedade hotu, papel sosiedade Sivil nian, partidu politikus sira nian, edukasaun públiku, papel governu nian atu nune'e hari sosiedade sira hodi bele konstrutivu liu tan, kompara ho sitausaun balun ne'ebé akontese iha rai laran.
"Ami sosiedade sivil hanoin katak, liberdade espresaun ne'e tenke kompletu, ami mós aprezenta situasaun ne'ebé halo kanek ita nia prespetiva demokrásia, direitu umanu nian".
Entretantu, tuir informasaun balun ne’ebé The Oe-Kusi Post asesu husi pájina ofisial Facebook Palásiu Prezidensiál nian katak, Prezidente Repúblika, Francisco Guterres Lú Olo, iha sorumutuk ho reprezentante La’o Hamutuk, hateten katak edukasaun permanente mak sei transforma sosiedade nia atitude.
Konxiensilizasaun mak dalan atu transforma sosiedade ida nia attitude. Tanba ne’e, Prezidente Repúblika husu parte hotu-hotu atu asume papél edukasaun ba transformasaun ema nian atu kontinua partisipa iha prosesu konstrusaun Estadu no Nasaun.
Prezidente Repúblika informa katak akompaña nafatin debate ne’ebé la’o dadaun iha públiku no la adianta hanoin ruma kona-ba planu Governu ninian kona-ba lei defamasaun. Maibé Prezidente Repúblika rona informasaun husi Governu katak proposta lei kona-ba defamasaun la’ós prioridade iha tempu agora.
Organizasaun La’o Hamutuk sujere atu uza kuadrus legais, hanesan prosesu sivíl, hodi prosesa kazu defamasaun, nune’e la presiza kriminaliza defamasaun.
La’o Hamutuk nu’udar organizasaun ne’ebé halo monotorizasaun ba prosesu dezenvolvimentu nasionál aprezenta ona submisaun kona-ba nia pozisaun kontra lei kriminalizasaun defamasaun ba Primeiru Ministru no Parlamentu Nasionál.
