MP halo rekursu ba desijaun kazu ai-moruk droga

DILI (TOP) – Tribunal Distrital Dili foti ona desijaun hodi kondena autor sira ne’ebé komete ai-moruk droga ho nia todan 3,53 Kilograma ba pena prijaun tinan lima, maibé Ministériu Públiku la satisfeitu ho sentensa ne’e, no desidi halo ona rekursu ba desijaun ne’e.

Prokuradór Jerál Repúblika (PRJ), José da Costa Ximenes kestiona desizaun juiz iha Tribunal Distrita Díli ne’ebé fó pena tinan 5 ba kazu droga ba autór krime kaer iha 14 janeiru 2020.

“La simu desizaun husi juiz ne’e, tanba ne’e Ministériu Públiku hatama ona rekursu liuhusi Tribunal Distrital Díli ba Tribunal Rekursu,” hatete PJR José da Costa Ximenes liu husi komunikadu imprensa ne’ebé The Oe-Kusi Post asesu iha pájina ofisial Palásiu Prezidensial Segunda 19 Outubru 2020.

“Buat ne’ebé ami preokupa uitoan mak mak juiz prezide julgamentu ida ne’e, foin tama iha karera seidauk to’o tinan ida. Se iha kazu balun, uluk kilograma 1 ba 10 anos, agora kilograma ba 5 anos,” nia afirma.

Nia dehan, territóriu Timor-Leste ohin loron kriminozu sira uza nu’udar fatin tranzitu ba destinu faan droga iha nasaun seluk.

PJR kestiona desizaun juiz ninian no hatama rekursu hasoru desizaun kaman husi tribunal tanba desizaun ne’e sei halo Timor-Leste kontinua sai fatin tranzitu ba krime organizadu sira relasiona ho sirkulasaun droga ninian. Juiz ne’ebé seidauk iha esperiénsia naton bele kaer kazu sira kaman hodi nune’e bele manán esperiénsia molok kaer kazu boot hanesan krime organizada.

“Ha’u aviza tanba saida mak ema uza Timor-Leste sai hanesan fatin tranzitu. Primeiru sistema kontrolu frajil, segundu kestaun kuadru legal, terseiru pena ne’ebé ki’ik. 3 kilograma droga puru, bele multiplika valór mais 3 miloins dolares amerikanu. Pena hanesan bele loke tan odamatan atu tama mai Timor-Leste,” nia esplika.

Jefriano Oqui
Author: Jefriano OquiEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE