DILI (TOP) — Primeiru-Ministru, Kay Rala Xanana Gusmão deklara ona ba públiku katak, sei hasai membru governu sira ne’ebé la hatudu prestasaun di’ak iha prosesu implementasaun programa governu, no Orsamentu Jeral Estadu (OJE) nian iha fulan marsu tinan ida ne’e.
PM Xanana esplika, molok atu foti desijaun hodi hasai ka ezonera membru governu ida sei halo uluk vizita ba kada ministériu hodi haree sira nia implementasaun programa no ezekusaun OJE ne’e tuir duni dalan loos ka la’e. Bainhira ezekusaun OJE la tuir programa ne’ebé iha ona mak ida ne’e sai nu’udar baze ida hodi “hasai” ka ezonera membru governu ruma.
“Ha’u dehan ba Prezidente katak agora mak foin hahú Orsamentu Jerál Estadu (OJE) 2024, ne’ebé promulga ona. Governu iha fulan neen (6) nia laran hadia uma-laran, agora mak tenki prepara aan atu ezekuta programa ne’ebé sira husu osan atu tau, tanba ha’u dehan ba Ministru no Ministra sira, iha fulan Marsu ba oin, ha’u sei la’o buka haree kada ministériu halo saida, se mak la halo sai, tau seluk bele kumpri, la’ós mai atu sai ami ema boot de’it, povu hili atu halo buat ruma ba rai ida ne’e,” PM Xanana hateten ba jornalista sira hafoin hala’o enkontru semanál ho Prezidente Repúblika, José Ramos-Horta iha Palasiu Prezidensiál, Nicolau Lobato Ai-tarak laran Dili, Kinta 04 Janeiru 2024.
Xefe governu ne’e hatutan, hafoin membru governu sira simu posse iha loron 1 Jullu 2023, durante fulan neen nia laran, governu konsentra maka’as ba hadia lejislasaun sira no diskuti lori programa noOJE 2024 nian ne’ebé Prezidente Repúblika José Ramos-Horta promulga ona ho montante billaun U$ 1,95.
“Bainhira membru governu sira hala’o serbisu la masimu bele troka iha dalan klaran, tanba kargu membru governu ne’ebé povu fó fi’ar atu hadia nasaun no povu nia-moris,” PM Xanana afirma.
Nia hatutan, durante fulan 6 nia laran membru governu sira idak-idak sei fokus de’it ba serbisu hodi instala sistema serbisu no hadia jestaun administrasaun iha liña ministérial no instituisaun Estadu nian tuir politika IX Governu Konstitusionál.
