DILI (TOP) – Dominico Sasia alias Bobos Bulalu mate tiha ona iha sala Intensive Care Unit (ICU) Hospital Nasionál Guido Valadares (HNGV) hafoin hemu tua ho Arsenio Paixão Bano iha nia restaurante Noliko iha Padimau, Oe-Kusi Ambeno.
Tuir informasaun balun ne’ebé The Oe-Kusi Post (TOP) asesu katak, iha Kinta 04 Janeiru 2024 kalan, Domi Sasi ho identidade Bobo Bulalu iha Facebook tuir hela enkontru ida ho Arsenio Paixão Bano nia restaurante Noi-Liko iha bairo Padimau, aldeia Sanane, suku Costa, Sub-rejiaun Pante Makassar, Oe-Kusi Ambeno.
Molok enkontru remata, mosu ona fotografia ida iha Plataforma media sosial (Facebook) hatudu, Arsenio Bano uja faru-mutin mak tuur lidera enkontru ne’e iha meja ulun, José António Afoan mak tur besik Bano, no tuir fali mak matebian Bobos Bulalu.
TOP observa, Bano ho nia kamarada sira la’os halo de’it enkontru, maibé mós hemu ho tua oioin inklui serveza BINTANG ne’ebé tau hela iha meja leten.
Hafoin remata enkontru ka remata hemu-tua hirak ne’e, tuir informasaun ne’ebé TOP asesu katak, ida-idak komesa hamrik ona hodi ba sira nia-uma. Klaru katak, matebian Bobos Bulalu lanu-todan ona, no konduz ka sa’e ba motor Honda Beat kor-mean sai husi restaurante Noi-Liko ba nia uma iha diresaun Samoro nian. Sai husi bairu Padimau ka restaurante Noi-Liko ne’e entre tuku ida ka rua kalan boot.
Matebian hatais kalsa badak Levis, no hatais faru mean. Konduz motorizada ne’e liu tiha Lourencio Caunan nia uma, Bobos Bulalu hetan ona dezastre iha fatin oan ne’e.
To’o oras ne’e seidauk iha rezultadu investigasaun klean ruma husi parte polisia Rejiaun Administrativu Espesial Oe-Kusi Ambeno (RAEOA) nian kona-ba motivu kazu ne’e. Katak, matebian mak monu rasik husi motor ne’e ka deskonfia iha kauza seluk mak halo nia monu hodi hetan kanek todan.
Maibé, faktu hatudu matebian hetan dezastre ne’e hafoin remata hemu-tua ho Arsenio Paixão Bano iha restaurante Noi-Liko.
“Kalan ne’e ami hare motor ida mak liu, no la kleur de’it rona tarutu maka’as. Ami dehan, lahatene se mak monu iha ne’eba. Ami tauk atu ba hare, tanba kalan boot ona. Monu kuaje oras ida ka rua hanesan ne’e mak foin rona ambulansia mai foti,” esplika komunidade ida ne’ebé hela besik fatin akontesimentu.
Iha parte seluk, motorista kareta ambulansia Julio Poto haktuir, nia foin hetan kontaktu husi nia maluk serbisu naran Lohe iha Sesta 05 Janeiru dadersan katak, Domi Sasi mak hetan dezastre iha Kinta kalan rezulta nia ulun parte kotuk kanek todan no ran sai maka’as liu husi inus, no tilun.
Tanba kondisaun ne’e todan tebes, médiku sira iha hospital RAEOA desidi hodi evakua matebian ne’e ho Mission Aviation Fellowship (MAF) husi rai-ketan Ambeno ba Dili hodi bele hetan tratamentu intensivu liu-tan iha Hospital Nasionál Guido Valadares (HNGV). Prosesu transportasaun pasiente ne’e iha loron Sesta 05 Janeiru horas meudia no to’o aeroportu Dili iha horas tuku 2 lorokraik ne’ebé akompaña husi nia maun Elias Sasi, no Jinha Tako nu’udar kaben husi matebian Domi Sasi (Bobos Bulalu).
To’o iha Dili kareta ambulansia Dili nian evakua kedas ba iha sala ICU, no iha loron Sábadu 06 Janeiru 2024 oras tuku 8:44 kalan Domi Sasi hakotu iis hodi husik hela nia familia tomak iha aldeia Saben, suku Bobometo, Sub-rejiaun Oe-Silo, Oe-Kusi Ambeno.
Jinha Tako, Elias Sasi no familia sira seluk ne’ebé akompaña mistériu mate ne’e sente laran triste tebes, tanba lakon ema ida sei iha idade produtivu no husik hela nia oan ki’ik sira, no oan ikus liu mak foin halo fulan rua.
Mate-isin transporta hikas ona ba rai-ketan Ambeno iha loron Domingu 07 Janeiru 2024 ho aviaun MAF.
Matebian hasai lisensiadu iha área turizmu nian husi universidade ida iha Indonézia iha tinan hirak liu-ba, no durante tinan barak nia laran serbisu iha kompañia TELEMOR Sukursal Oe-Kusi Ambeno, no durante ne’e mós ativu tebes iha partidu FRETILIN nu’udar membru Juventude FRETILIN RAEOA nian.
Ho involvimentu iha partidu FRETILIN ne’e mak ikus mai sai belun di’ak, kamarada di’ak ho Arsenio Paixão Bano durante ne’e. Tanba ne’e, hafoin rona lia-mate ne’e Bano hato’o kedas nia sentidu kondolensia iha Plataforma media sosial katak, nia mós sente triste tebes.
