DILI (TOP) – Governu planeia ona atu aprezenta lista úniku ba kandidatu Komisariu Komisaun Anti-Korupsaun (KAK) ba Parlamentu Nasionál (PN) hodi hau debate ona atu bele tau matan ba kazu korupsaun sira ne’ebé oras ne’e sei kontinua pendente hela.
Vise-Ministru Asuntus Parlamentares, Adérito Hugo da Costa hateten, posibilidade governu sei deside lista kandidatu Komisariu KAK na'in ida de'it mak atu avansa, entre Sergio Hornai ho Rui Pereira ba Parlamentu Nasionál hodi halo eleisaun.
Governante mai husi munisipiu Manufahi ne’e relembra, iha semana kotuk reuniaun Konsellu Ministru sira halo ona apresiasaun ba situasaun sira desde primeira submisaun kandidatu komisariu nian tinan kotuk to'o Dezembru 2023.
Fundador ba Jornal Diariu Timor Post ne’e katak, Konsellu Ministru sira halo apresiasaun hodi konsidera ona katak, primeira korespondensia ne'ebé ke halo submete ba PN deside konsidera la iha andamentu. Tanba depois kontaktu bankada sira halo entre FRETILIN no CNRT la konsege iha konsensu.
"Entaun Konsellu Ministru sira konsidera ona katak, primeira via korespondensia ne'e para ona, no governu sei ho segundu via korespondensia, depois analiza no rona kontaktu bankada sira halo durante primeira korespondensia nian. Nune'e bele haruka fali kandidatu foun submete mai PN, depois analiza kontaktu iha primeira korespondensia ne'e," nia hateten ba jornalista sira hafoin akompaña plenaria iha Parlamentu Nasional, Dili, Tersa 16 Janeiru 2024.
Bainhira mak sei aprezenta kandidatura Komisariu KAK ba PN? Eis Xefe Redasaun Jornal Diariu Suara Timor-Lorosa’e (STL) ne’e dehan, sei hare iha ajenda reuniaun Konsellu Ministru tuir mai mak sei desidi lista kandidatu komisariu ne’e mak depois sei submete ba iha PN hodi realiza eleisaun.
"Klaru ami iha ona kandidatu foun. Hanesan ohin ha'u dehan ami sei aprezenta mai PN la'os ona kandidatu na'in rua (2) maibé ami sei aprezenta mai PN kandidatu komisariu na'in ida (1) de'it, bazeia informasaun ami rona atraves kontaktu bankada sira halo iha primeira submisaun ne'e. Kandidatu ne'e entre rua ne'e na'in ida," nia informa.
Nia akresenta, lista kandidatu komisariu na'in ida ne'ebé governu sei deside ne'e la'os kandidatu foun, maibé kandidatu na'in rua Sergio Hornai no Rui Pereira ne'ebé antes ne'e governu ona haruka ba PN maibé la hetan konsensu.
"Entre kandidatu rua ne'e na'in ida, tanba bazeia informasaun ne'ebe ami rona husi kontaktu sira konsesuias hosi bankada sira. Kandidatu Sergio Hornai no Rui Pereira sei avansa na'in ida, maibé kandidatu na'in ida ne'e ha'u lalika pronunsia lai. Tanba ami sei submete naran entre sira na'in rua ne'e na'in ida ne'ebé ke bankada sira nia preferensia", nia hato'o.
"Ami hanoin katak, entre sira na'in rua ne'e bankada sira iha preferensia ba na'in ida. Hanoin katak bankada sira bele halo deit ona eleisaun, maibe sira husu labele para atu garante bankada sira-nia votus iha eleisaun, entaun Prezidente bankada sira husu retira tiha rua ne'e, aprezenta ida deit ne'ebe sira iha akordu ba malu."
Hahu husi Janeiru to’o 21 Novembru 2023, kazu sira ne’ebé relasiona ho denunsia públiku hamutuk 83, husi númeru kazu ne’e iha kazu-35 mak kabe ba kompeténsia KAK nian hodi kontinua halo averiguasaun, restu ba instituisaun sira hanesan, PDHJ ho Inspesaun Jerál Estadu.
Antes ne’e, Diretór Jerál Investigasaun KAK, José de Araújo Verdiál hateten, hahú kedan iha fulan Abril 2023, bainhira mandatu Komisáriu KAK nian termina, prossesu hotu pendente ho totál kazu-49.
