DILI (TOP) – Reprezentante espesial ba Greater Sunrise Stephen Philip Bracks rekoñese projetu Greater Sunrise ne’e importante tebes ba povu no prosesu dezenvolvimentu ekonómia iha Timor-Leste.
Steve Bracks hatutan, nia parte sei halo esforsu maka’as atu serbisu hamutuk ho governu rua, Timor-Leste no Austrália hodi dezenvolve projetu Greater Sunrise iha tempu oin mai.
“Austrália rekoñese projetu Greater Sunrise importante tebes ba povu Timor-Leste, Austrália iha komitmentu ba serbisu ho Timor-Leste atu dezenvolve projetu ne’e ba oin iha maneira ne’ebé ho teknikamente viavel no komersialmente ba projetu ida ne’e,” hateten reprezentante espesial ba Greater Sunrise Stephen Philip Bracks ba jornalista sira hafoin remata sorumutu ho Primeiru-Ministru, Kay Rala Xanana Gusmão iha Palásiu Governu, Dili Segunda 18 Setembru 2023.
Politiku Austrália husi Partidu Traballista ne’e hatutan, nu’udar reprezentante espesial ba Greater Sunrise la’os foin mak mai vizita Timor-Leste, maibé kuaje mai vizita dala ha’at (4) ona, no sei mai vizita tan hodi halo diskusaun klean kona-ba oinsa bele dada kadora no dezenvolve projetu Greater Sunrise ne’e iha tempu badak.
“Iha tempu badak sei diskute kle’an liu-tan kona-ba oinsa mak atu dezenvolve di’ak liu-tan projetu dada kadoras ka Greater Sunrise iha Juñu tinan oin,” Steve Bracks promete.
Politiku Australianu ne’e rekoñese katak, governu Austrália oras ne’e komprende klean tebes kona-ba mehi no dezeju governu atual atu dada lalais kadoras mina-rai ne’e mai Timor-Leste hodi dezenvolve rai ne’e ba oin.
“Maibé, ami tenke haree ba estudu ne’ebé agora daudauk atu halo ba viabilidade ekonómiku ne’ebé mak sei fornese ba Timor-Leste, no ba kompañia sira ne’ebé envolve iha projetu ne'e rasik tama,” Steve esplika.
Nia dehan, prosesu estudu viabilidade ne’e sei remata iha fulan Maiu tinan oin, no tam aba fulan Juñu nia laran mak foin avansa ba prosesu diskusaun klean nian.
Primeiru-Ministru, Kay Rala Xanana Gusmão durante kampaña politika hahu husi kampaña ba eleisaun prezidensial 2022 to’o kampaña ba eleisaun parlamentar 2022 sempre promete ba votante sira katak, bainhira hetan konfiansa husi vontade popular, nia governu sei halo esforsu maka’as atu bele dada kadoras Greater Sunrise mai Timor-Leste hodi bele loke kampu serbisu foun barak ba Timoroan sira.
Dezenvolvimentu Greater Sunrise, inklui kampu gás no kondensadu Sunrise no Troubadour, lokalizadu iha tasi entre Timor-Leste ho Austrália.
Empreza Australiana Woodside Energy Group nu’udar operadora projeto ho nia partisipasaun 33,44%. Empreza petrolífera nasionál Timor-Leste, TIMOR GAP, iha asaun 56,56%, enkuantu asaun restu 10% ne’e ba empreza Japoneza, Osaka Gas. Kampu rua ne’e deskobre bad ala uluk iha tinan 1974.
Kampu Greater Sunrise lokaliza iha ne’ebé?
Distansia kampu Greater Sunrise mak 450Km ba Darwin, Australia no hamutuk 150Km mai Timor-Leste. Estimasaun rezerva ba rekursu natural ne’e mak millaun 226-barrel kondensadu.
