SABULI (TOP) – Partidu FRETILIN oras ne’e hala’o hela serbisu maka’as iha teritoriu nasionál ho tema Lori Naroman ba Povu, maibé estrutura sira iha baze hahu monu-namtate dadauk ba partidu CNRT ne’ebé lori tiha ona naroman ba povu iha mandatu governasaun tinan 10 ikus ne’e.
FRETILIN ne’ebé uluk vota kontra programa eletrifikasaun nasionál iha Parlamentu Nasionál ohin loron uja fali tema Lori Naroman ba Povu iha eleisaun parlamentar tinan ida ne’e.
Ho inkonsistensia politika FRETILIN nian ne’e mak rezulta kamarada lubuk ida iha teritoriu nasionál injua ona ho prinsipiu kumu-liman metin hodi halo ona afiliasaun ba partidu CNRT durante ne’e.
“Ha’u nia familia sira uluk iha partidu FRETILIN no Partidu Demokratiku (PD) iha Metinaro nia laran hakarak hato’o ami nia bem vindo ba Sekretariu Jeral Partidu CNRT ne’ebé mai iha suku Sabuli hodi simu afilia husi familia sira ne’ebé uluk iha FRETILIN no PD ba CNRT. Ami fó apoiu tomak ba partidu CNRT hodi hetan vitoria iha eleisaun parlamentar iha loron Domingu 21 Maiu 2023,” deklara Portavoz afiliante atual eis segundu vise-koordenador partidu FRETILIN Postu Administrativu Metinaro, Simão Mendonça iha suku Sabuli, postu Metinaro-Dili, Sesta 17 Marsu 2023.
“Hanesan Metinaro-oan ami mós kontente no agradese ba partidu CNRT ne’ebé hili ona ami nia maun-alin Fausto Soares Dias naran tama hotu ba lista kandidatura ba membru deputadu ba iha mandatu 2023 to’o 2028,” Simão Mendonça afirma.
Nia hatutan, militante sira husi FRETILIN no PD hamutuk nain 67 mak desidi afilia ona ba partidu CNRT hodi fó vitoria ba partidu ne’e rasik atu bele lori Kay Rala Xanana Gusmão fila assume hikas kargu nu’udar Primeiru-Ministru iha governasaun foun tuir mai.
Militante afiliante sira ne’e kompostu husi mane hamutuk nain 42, no feto hamutuk nain 25.
“Ami prontu simu programa CNRT nian, no ami sei hala’o serbisu maka’as atu halo door to door no konvense familia sira iha partidu seluk hodi mai hamutuk iha CNRT”.
Afiliasaun husi PD nian reprezenta husi eis segundu vise-koordenador PD suku Sabuli, Luis Soares ho nia membru sira.
Iha fatin hanesan, Sekretariu Jeral Partidu CNRT, Dato Sri Francisco Kalbuadi Lay simu afiliante sira ne’e ho laran ksolok tebes, tanba fiar ba partidu CNRT ne’e iha programa di’ak ba futuru nasaun no povu nia moris di’ak iha tempu oin mai mak estrutura no militante husi partidu sira seluk desidi afilia ba CNRT.
