BAUKAU (TOP) – Maske Durante ne’e governu viabilizador husi partidu FRETILIN halo Uma ba Kbi’it La’ek sira, no fahe ai-han dodok ba povu sira iha teritoriu nasionál, maibé programa hirak ne’e la konsege kesi-metin kamarada sira balun iha munisipiu Baukau hodi kontinua kumu-metin liman ba FRETILIN, maibé desidi afilia ona ba CNRT hodi hetan vitoria iha eleisaun parlamentar tinan ida ne’e.
Total afilasaun husi partidu seluk ba CNRT ne’ebé akontese iha munisipiu Baukau hamutuk 300 resin husi partidu FRETILIN, KHUNTO, Partidu Libertasaun Popular (PLP), no Partido Demokrátiku (PD).
Koordenador Movimentu Dinamizador ba partidu CNRT munisipiu Baukau, Aderito Domin hateten, ninia fatin ne’e nu’udar fatin ida hodi hamaus ema hotu.
Nia hatutan, iha nia fatin ne’e mós fó kontribuisaun lubuk ida ba Prezidente Partidu Libertasaun Popular (PLP) hodi ikus mai ba assume kargu nu’udar Primeiru-Ministru.
“Dala ida tan, fatin kmaus ida ne’e sei lori tan Maun Boot Kay Rala Xanana Gusmão ba vitoria iha eleisaun parlamentar ne’e, ba Baukau-oan tomak hotu sei fó sira nia votu ba maun Xanana,” hateten Aderito Domin liu husi nia diskursu badak ida iha konsolidasaun partidu CNRT rejional husi munisipiu Lautem, Vikeke, no Baukau ne’ebé hala’o iha Aderito Domin nia rezidensia iha Baukau, Sábadu 18 Fevereiru 2023.
Iha fatin hanesan, veteranu Alin La’ek konsidera ninia Komandante em Chefe das FALINTIL, Kay Rala Xanana Gusmão nu’udar ai-hun boot ida iha Timor-Leste desde tempu rezistensia kontra kolonial Indonézia to’o ohin loron.
Alin La’ek informa ba sira ne’ebé desidi afilia on aba partidu CNRT katak, afiliasaun ne’e la sala ida, tanba Xanana mak nu’udar hun ba buat hotu.
“Imi nia afiliasaun ne’e la sala ida, tanba hun mak ida ne’e duni, Xanana mak la iha Timor ne’e la uku naan ida,” hateten Alin La’ek.
Alin La’ek konta, antes ne’e nia tama iha PLP, maibé hafoin mosu impase politika, nia desidi tama fali ba CNRT, tanba tuir veteran ne’e katak CNRT mak dala loos hodi lori nasaun ne’e ba naroman.
Iha fatin hanesan, Sekretariu Jeral partidu CNRT, Dato Sri Francisco Kalbuadi Lay fó sai lista ema husi suku sira ne’ebé desidi afilia ba CNRT hamutuk 11.
Afiliante Angelo de Oliveira Ximenes husi suku Afasat, postu Kelikai husi partidu FRETILIN mós desidi afilia ona ba partidu CNRT hodi lori hikas Kay Rala Xanana Gusmão ba assume hikas kargu nu’udar Primeiru-Ministru.
“Ha’u husi partidu FRETILIN, durante tinan 20 fó apoiu ba ita nia partidu historiku, maibé maluk sira kontinua halo diskriminasaun. Ami fó votus ba sira, maibé sira fasilita de’it sira nia familia mak hetan buat hotu. Ho ida ne’e mak ami hakarak afilia ba CNRT hodi Maun Boot Xanana bele hadia tiha situasaun nasaun RDTL, no halo dezenvolvimentu ba povu hotu iha Timor laran tomak,” Angelo hato’o nia deklarasaun politika.
“Ha’u lori militante FRETILIN hamutuk 135 husi suku Afasat afilia ba CNRT, no ha’u fiar katak CNRT sei manan iha suku Afasat,” deklara Angelo.
Nune’e mós Albino Dias Marcal husi aldeia Bahamori, suku Gariuai husi PD deklara katak, sei halo esforsu atu lori estrutura PD iha suku Gariuai hodi vota ba CNRT iha eleisaun parlamentar ne’e, tanba tuir nia katak, to’o ona tempu ba CNRT hodi ka’er ukun fali atu bele hadia no halais prosesu dezenvolvimentu iha rai-laran.
Prezidente Partidu CNRT, Kay Rala Xanana Gusmão simu afiliante sira ne’e ho fuan no laran tomak, maibé Xanana hateten ba afiliante sira katak, nia kontente tanba afiliante sira rasik mak desidi ho konsiensia rasik hodi apoiu ba CNRT iha eleisaun parlamentar ne’e.
“Ha’u kontente tanba, imi desidi ho imi nia konsiensia rasik, no partidu ne’e laiha liu intensaun atu ba sobu partidu sira seluk, ne’e laiha liu,” hateten Xanana.
Xanana hatutan, prosesu dezenvolvimentu iha tinan hirak ne’e paradu total maske governu konsege hasai ona osan hamutuk billaun U$ 9 resin durante tinan lima nia laran, maibé rezultadu ne’e sai kestionavel, tanba faktu hatudu povu barak mak sei halerik kona-ba kondisaun estrada no neseisdade sira seluk tan.
