BELULI (TOP) – Koordenador Partidu FRETILIN Munisipiu Ermera, Osvaldo Quin José Amaral “Otak Baru” hamutuk h onia kamarada sira nain-500 resin lakohi ona “kumu liman mamuk” ba Sekretariu Jeral Partidu FRETILIN, Mari Bim Amude Alkatiri tanba, sira desidi afilia ona ba partidu CNRT hodi lori hikas Komandante em Chefe das FALINTIL, Kay Rala Xanana Gusmão ba ka’er ukun.
Eis Kamarada Otak Baru ho nia eis kamarada sira hamutuk nain-500 resin molok hato’o sira nia deklarasaun politika, ba dala uluk eis kamarada hirak ne’e husu dekulpa ba Kay Rala Xanana Gusmão tanba, iha tempu indepenesia durante tinan 20 ona sira izola aan husi Xanana, no rabat fali Mari Bim Amude Alkatiri ho Francisco Guterres Lú Olo iha partidu FRETILIN. Maibé, ohin loron ho sira nia fuan-laran no kabun tomak desidi hodi hamutuk fali ho partidu CNRT atu lori hikas Kay Rala Xanana Gusmão ba ka’er ukun hodi hadia no aselera prosesu dezenvolvimentu nasionál.
Sekretariu Jeral Partidu FRETILIN, Mari Bim Amude Alkatiri./Net.
“Ami sira ne’e mesak juventude rezistensia de’it, antigu membru husi ita boot (Maun Xanana) nia membru sira, ami husu perdaun ba Komandante em Chefe das FALINTIL nu’udar mós Prezidente Partidu CNRT, tanba durante tinan 20 ami ses aan husi Maun Boot Xanana, uluk tempu rezistensia ami hotu-hotu viva maun Boot Xanana, pelu-kontrariu iha tempu ukun aan, ami la’o sala dalan, la’o tuir fali ema seluk, tanba me’e mak ami husu perdaun. Tanba tinan 2o ona, hakarak ka lakohi hanoin ida tempu to’o ona ami prontu fó apoiu tomak ba maun boot Xanana, atu ukun fila-fali, nune’e bele hadia povu no nasaun nia moris ekonomia no dezenvolvimentu, tanba so Xanana maa hatene povu nia terus,” Eis Kamarada Osvaldo Quin José Amaral “Otak Baru” hato’o deklarasaun politika ne’e iha aldeia Beluli Suku Potete, Postu Administrativu Ermera, munisipiu Ermera, Sesta 17 Fevereiru 2023.
Prezidente Partidu CNRT, Kay Rala Xanana Gusmão partisipa konsolidasaun Partidu CNRT no simu militante FRETILIN deklara afilia ba CNRT iha Aldeia Beluli Suku Potete, Postu Administrativu Ermera, munisipiu Ermera, Sesta 17 Fevereiru 2023.
Eis kamarada Otak Baru ne’e nu’udar membru FRETILIN rezistensia, nia husu ba kamarada FRETILIN sira seluk iha munisipiu Ermera no iha munisipiu sira seluk atu labele se kotuk ba Xanana, maibé agora tenke apoia Xanana hodi hadia hikas nasaun ne’e nia destinu.
“Maun mak ami nia mestre iha ai-laran, buat ida rezistensia ne’e mak halo ita ka’er malu metin. Kamarada Mari Alkatiri no Lú-Olo mai iha ne’e, ha’u ho ha’u nia kamarada sira mak lori mai, prontu ami la’o nu’udar ema la ses husi sala, maibé sala presiza hadia, tanba ne’e mak iha tinan 2019 konvida maun Samuel Marçal dehan katak, ha’u hakarak fila-fali ba ho Maun Xanana.Tanba ne’e ohin loron ami mai hamutuk iha ne’e ho neon ida no laran ida, tanba maun Xanana mak hatene hadomi ema, maun Xanana mak hatene ita nia lisan, Maun Xanana mak hatene ita nia kultura, izemplu hanesan maun Xanana mai iha ami nia fatin ida ne’e. Ne’e mak maun Xanana mak iha direitu ba tuur iha uma lulik Palasiu Governu, uniku maun Xanana de’it, seluk ne’e labele,” nia hateten.
Nia dehan, FRETILIN durante ne’e sempre metin iha Ermera tanba sira, maibé agora sira organiza malu hodi la’o iha dalan ida de’it ho partidu CNRT atu hadia nasaun no leno naroman ba povu nia moris.
Eis kamarada Otak Baru mós observa katak, governasaun durante tinan lima ne’e nunka haree hetan FRETILIN ne’ebé ba apoiu ba PLP, nunka halo programa dezenvolvimentu infraestrutura ruma atu hadia povu nia moris no bainhira povu hasoru susar no ternus, úniku Xanana mak lolo-liman tun ba ajuda povu hodi buka rezolve povu nia susar no terus.
Hafoin halo deklarasaun, koordenador FRETILIN munisipiu Ermera ne’e mós husu ba militate hotu-hotu hamarik halo juramentu la’o ho Xanana atu hadia rai no povu nia moris.
“Ba Komandante em Chefe das FALINTIL iha ami hotu- hotu nia oin, hodi marka istória ki’ik ida iha ami nia kaixa rezistensia, keta maun Xanana mós iha duvida loos duni ka la’e!?, tebes duni ka la’e!?. Ami husik hela Partidu FRETILIN hakarak mai hamutuk ho partidu CNRT. Ami deklara dala ida tan katak, iha maun nia oin, ami hotu prontu ho hanoin no hakarak ida de’it katak, tempu to’o ona atu fó apoia tomak ba maun Boot Xanana atu lidera rai ida ne’e, se la’os agora bainhira tan,” nia afirma.
Prezidente Partidu CNRT, Xanana Gusmão agradese ba afiliasaun husi kamarada FRETILIN sira komesa hanoin no akompaña ona situasaun Timor-Leste la’o oinsa, tanba alisersa estadu nian ai-rin haat nakdoko, tanba sistema sobu arbiru, halo estadu sai fraku liu-tan.
Prezidente Partidu CNRT, Kay Rala Xanana Gusmão partisipa konsolidasaun Partidu CNRT no simu militante FRETILIN deklara afilia ba CNRT iha Aldeia Beluli Suku Potete, Postu Administrativu Ermera, munisipiu Ermera, Sesta 17 Fevereiru 2023.
“Imi mak hatudu no imi bele haree, imi mak hatudu imi mak bele desidi. Ha’u kontente, se imi bele haree saida mak akontese iha ita nia rain, no atu lembra katak, ita presiza hamutuk hodi hadia rai ne’e,” nia afirma.
Xanana hatutan, nia respeita tebes FRETILIN durante tempu rezistensia, no ema hirak ne’ebé deklara afilia ba CNRT la’os ho hanoin atu sobu FRETILIN, maibé povu no afiliante sira konsiente katak, partidu ida ne’ebé merese ba sira atu hili hodi hadia futuru nasaun mak partidu CNRT ne’e duni.
“Ha’u kontente tanba imi mai la’ós atu sobu partidu seluk, tanba iha 1999 povu rasik haree bandeira merah putih hari tomak iha Timor laran, too votasaun, sira ba vota ukun aan. Ida ne’e hatudu katak, povu matenek duni, atu haree no hili tuir sira nia konsensia,” Xanana agradese.
Xanana mós dehan durante tinan 10 nia laran, CNRT ukun gasta duni osan billiaun 10-liu halo duni dezenvolvimentu, maske ema kritika katak, CNRT la halo buat ida, maibé se kompara ho partidu sira ne’ebé ukun agora konsege gasta ona osan milliaun U$ 9 resin, maibé povu la sente buat ida.
“Iha tinan 10 CNRT ka’er ukun gasta billaun 10- liu, mais halo buat barak, no buat barak la hotu, mais se kompara ho ida ukun tinan 5 ne’e ita la haree buat ida, sira gasta ona billaun U$ 9, entaun povu haree no deside tok ba, ida ne’ebé mak di’ak, tanba bele hatudu iha hanoin naruk dezenvolve rai ne’e, bele la’o neneik, mais povu rasik sente no haree ona. Agora tinan 20, imi haree, imi sukat no tau iha imi nia ulun katak, dalan loos mak ne’e, agradese tebes ba imi fó konfiansa ba CNRT,” tenik nia.
Troika FRETILIN./Net.
Iha CNRT nia inu dehan, rai ida ba povu ida, ne’e duni Xanana pela ba maluk sira iha FRETILIN ne’ebé hamutuk ona ho CRNT, organiza malu dehan ba povu atu hili partidu ida ne’ebé sira haree hetan atu hadia rai Timor.
Xanana mós husu ba apoiante CNRT no militante partidu seluk, atu la lika hare ba história, tanba ema hotu iha ninia kontribuisaun rasik ba rai ida ne’e, maibé tenke hare ba vizaun ba dezenvolvimentu.
“Ha’u FRETILIN, iha tinan 1986 ha’u sai husi FRETILIN atu ka’er funu, lalika kahor politika iha funu, tanba kahur demais mak ita lakon buat sira ne’e. Hakarak sai Prezidente FRETILIN, Prezidente Republika, la’e! o funu ne’e atu liberta rai, la’os atu sai ida ne’e, ida ne’eba, o tenke hanoin de’it funu, atu forsa sira kaptura tan kilat ka halo nusa”.
Tuir Xanana, husi CNRT mosu iha tinan 2007 konsege hakotu konflitu entre Timor-oan, hodi labele oho malu tan no projeta ba dezenvolvimentu rai ida ne’e.
Kamarada FRETILIN nain 500 resin iha munisipiu Ermera desidi afilia ona ba partidu CNRT, Sesta 17 Fevereiru 2023.
“Imi nia joven sira, haruka took sira husu partidu hot-hotu, sira iha hanoin ita-nia rai povu nia moris ka lae? Ha’u bele dehan katak lae! CNRT mosu la’os tanba ambisaun atu sai Primeiru-Ministru lae!, tan oho malu, IDPS barak, ne’e mak cnrt mosu iha 2007, tanba la simu katak, depoiz funu mate liu rihun atus rua, ukun-an tiha oho malu nafatin, ho ida ne’e mak CNRT mosu” hateten Xanana hodi reflete ba existénsia CNRT durante tinan 10 resin.
Atu halo mudansa ba situasaun ne’ebé akontese, mak líder polítiku ne’e apela ba apoiante partidu CNRT, hodi serbisu maka’as liu-tan atu bele hetan kadeira 33 iha Parlamentu Nasionál no forma governu ne’ebé estável hodi hala’o dezenvolvimentu.
“Atu hetan parlamentu ida forte, konsisitente, tanba ne’e ita tenke serbisu maka’as atu mana’an mínimu kadeira 33, hodi korizi tiha saida mak sira halo arbiru de’it ne’e. Ba tinan ida ne’e, orsamentu la'os itoan, billaun U$ 3 kedas ne'e atu halo lerek saida? Fundu Covid-19 nia relatóriu mós to'o ohin loron la iha. Halo saida, sesta bazika, sosa saida? Se mak hetan osan, ita la hatene. CNRT ukun tinan 10 gasta osan osan billaun U$ 10. Agora sira durante tinan lima nia laran de'it konsege gasta ona osan hamutuk billaun U$ 9, maibé rezultadu la iha!,” Xanana kestiona no halo komparasaun.
Líder Nasionál ne’e relembra katak, CNRT iha ona vizaun ho mata-dalan ba governasaun mak, Planu Estratéjiku Dezenvolvimentu Nasionál – PEDN, hodi apoia exekusaun programa sira ba prosesu dezenvolvimentu nasionál.
Prezidente Partidu CNRT, Kay Rala Xanana Gusmão partisipa konsolidasaun Partidu CNRT no simu militante FRETILIN deklara afilia ba CNRT iha Aldeia Beluli Suku Potete, Postu Administrativu Ermera, munisipiu Ermera, Sesta 17 Fevereiru 2023.
“La to’o fulan ida rezolve problema (krize), atu halo saida ba povu, iha ona govenru, problema la iha ona, iha momentu 2009 iha dehan Adeus konflitu benvindu dezenvolvimentu, ha’u kontente katak, povu tomak simu palavra de ordem, hodi simu dezenvolvimentu. La’o hale’u Timor tomak hodi buka hatene potensial, kona-ba dezenvolvimentu ne’e mak hamosu PEDN, 2009, 2010 govenru aprezenta iha Parlamentu planu eletrefikasaun, ema hotu kontra ne’e estraga de’it osan, maibé ha’u la simu, ita iha osan, maibé povu moris iha nakukun laran, ha’u la simu,” hateten Xanana.
Iha fatin fatin hanesan, Vise Prezidente Partidu CNRT, Gil da Costa “Oan Soru” husu ba povu labele tauk atu vota ba CNRT, tanba CNRT hanesan lilin ne’ebé sei leno no fó naroman ba povu no nasaun Timor-Leste nia moris.
Nune’e mós Koordenador HAP-CNRT, Samuel Marçal sei kontinua mobiliza ekipa halibur membru grupu partidu politiku sira seluk atu la’o hamutuk ho CNRT.
Samuel dehan, rai ida ne’e ezije atu ema hotu- hotu hamutuk hodi apoia CNRT Lori Xanana hodi hadia rai ne’e ba oin.
Eis Diretor ba Ajensia Dezenvolvimentu Nasionál (ADN) ne’e esplika, ohin loron lider partidu politiku barak lori-kalen, sesta bazika, osan U$ 200 hodi fahe ba povu, ida ne’e nu’udar hahalok ida ne’ebé la komprende kultura no tradisaun Timor-Leste nian.
Samuel Marçal mós krítika programa sira ne’ebé halo iha tempu besik kampaña eleitoral ona.
“Ohin loron kampaña besik ona, ema barak lori kalen tama-sai besi-besik uma, sesta basika, 200 dolar tuir tuir ema nia uma. Mas keta haluha, hahalok hanesan ne’e la kompriende kultura Timor nian. Tradisaun mak ita tempu susar no ksolok hamutuk, la’os besik de’it eleisaun mak presiza malu” hateten Samuel Marçal.
Vise Sekretáriu Jerál CNRT, Jacinto Rigorberto de Deus garante katak, munisípiu Ermera sei fó votu rihun 50 ba partidu CNRT iha eleisaun parlamentar ne’ebé sei akontese iha loron Domingu, 21 Maiu 2023.
Vise Sekretáriu Jerál CNRT, Jacinto Rigorberto de Deus. Foto TOP.
Vise Prezidente CNRT Gil da Costa - Oan Soru mós kritika govenu nia polítika ne’ebé realiza wahira besik ona kampaña, ho intensaun atu manaan de’it votus.
“Ha’u la’o iha fatin balun, ha’u hateten politika osan U$ 200 no sesta bazika ne’e hanesan lider ida karik, la iha vizaun, tanba bainhira udan tun, bee iha, udan la tun mota mós maran tiha. Ita tenke troka politika ne’e, ita presiza politika ida ne’ebé maske udan la tun mós bee mota ne’e sulin nafatin”.
Tanba ne’e, Oan Soru hateten, desizaun iha loron 21 fulan Maio, importante, hodi halo mudansa ba rai ida ne’e.
“Ita bo’ot sira nia votu iha 21 Maiu hanesan votu agradesimentu ba Avo Nana no fó responsabildiade ba nia, tanba rai ida ne’e sei presiza hela nia, imi nia desizaun ne’e importante tebes”.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
