DILI (TOP) – Jeneral Reformadu Lere Anan Timor rejeita fó orientasaun ba nia apointe sira hodi vota ba partidu CNRT iha eleisaun parlamentar ne’e, maibé konsidera no rekoñese politika ne’e nu’udar buat bosok ida.
Antes ne’e, eis Koordenador Ekipa Susesu ba eis Kandidatu Prezidente Repúblika Jeneral Reformadu, Lere Anan Timor, David Lay deklara sira simu ona orientasaun politika direita husi Lere hodi fó votu votória ba Komandante Em-Xefe-das FALINTIL hadia problema nasaun.
David Lay.
“Ami mak uluk apoiu maun Lere Anan Timor Kandidatu ba Prezidente Repúblika 2022-2027 konsege hetan votus, depois ba eleisaun segundu volta, ami deside apoia maun, José Ramos-Horta ba prezidente. Agora ba eleisaun parlamentar, Pai Lere hateten, ninia votus labele so’e, fó fali de’it ba Maun Boot Xanana iha eleisaun parlamentár agora,” David Lay hato’o orientasaun Lere nian iha konsolidasaun partidu CNRT iha salaun Parokia Manatuto-Vila, Sábadu, 11 Fevereiru 2023.
David Lay hatutan, ho orientasaun politika Jenerál Reformadu Lere nian, dadaun ne’e sira sei kontinua la’o hamutuk ho estrutura Partidu CNRT iha Mananatu too baze hodi husu nafatin konfiansa ba povu fó votus CNRT.
“Politika hanesan ohin dehan ne’e nunka moos, ohin ko’alia ida, aban ko’alia seluk. Ijemplu uluk ha’u komandante, ha’u la oho inimigu barak mós pelu-menus ha’u dehan katak, iha tinan 24 nia laran ha’u oho 50 de’it ha’u oho. Kilat la barak mós pelu-menus cinquenta armas ha’u kaptura. Maibé, presiza halo bosok, ha’u tenke iha tatika para ha’u bele iha susesu. Agora politika mós hanesan ne’e, ema joga politika, ema joga tatika para bele hetan susesu. Ne’ebé ba ha’u sira sei hateten katak ha’u hatete ka la hatete ba ha’u laiha problema,” hateten Lere liu husi GRANDE ENTREVISTA ho GMN iha edisaun Segunda kalan, 13 Fevereiru 2023.
Lere Anan Timur./Net.
“Sira ne’ebé mak deklara iha Manatuto ne’eba keta CNRT nian karik, ita la hatene, no maun Xanana mós Manatuto ninian, ha’u la fiar katak, ha’u. Ne’e mak ha’u hanoin katak, sira ne’ebé dehan katak, ha’u fó orientasaun, ha’u nunka fó orientasaun, ami nia ekipa susesu ninian ha’u hanoin katak, disolvidu ona ha’u agradese sira iha loron 12 Fevereiru 2023 iha Pantai Kelapa iha ha’u nia rezidensia. Ne’e mak ha’u hanoin katak, ida ne’e politika ema hakarak fiar, fiar, lakohi fiar, la fiar. Ha’u la obriga ema ida atu fiar,” Lere afirma.
Biar nune’e, veteranu kompleta tinan 24 iha ai-laran ne’e kontinua husu ba povu tomak iha rai-laran atu iha eleisaun parlamentar ne’e labele fihir ba partidu politika, maibé di’ak liu fihir no vota ba lider no figera ne’ebé iha tanba, tuir Lere katak, eleisaun parlamentar ne’e nu’udar pájina ikus nian ona ba figura ne’ebé iha.
Lere konsidera eleisaun parlamentar ne’ebé sei akontese iha loron Domingu, 21 Maiu 2023 nu’udar problema boot, no dezafiu boot ba FRETILIN, ne’e kombate boot atu FRETILIN manan iha eleisaun ne’e.
“Maibé, ha’u nu’udar FRETILIN balun…ijemplu foin lalais deklarasaun iha Manatuto nian dehan katak, ha’u mak orienta sira, ha’u dehan durante tinan 24 ha’u nem Segundo ida trai FRETILIN, ha’u nunka trai. Uluk ha’u kompromete ha’u nia aan atu mate ba FRETILIN, maibé ha’u la mate ate agora hamutuk ho FRETILIN, ha’u mate mós FRETILIN sei iha nafatin,” hateten Lere.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
