SANTA ROSA (TOP) – Tribunal Distritral Oe-Kusi Ambeno liu husi leitura sentensa aplika ona pena prizaun fulan 5 no suspende tinan ida ba arguidu Arsenio Paixão Bano ho arguidu nain 3 Seluk.
Arguidu nain 3 seluk hanesan arguidu Paulo Jorge da Costa Denis pena prizaun fulan 9 suspende ba tinan 1, arguida Sanchia Florência Paixão Bano alias Meta Bano hetan pena prizaun tinan 1 suspende tinan 1, no arguidu Luis Armando Sequeira da Cruz Pina hetan pena prizaun tinan 1 fulan 6, suspende ba tinan 2.
Tribunal Ambeno aplika pena 2, pena multa no pena prizaun ba arguidu nain 4 inklui arguidu Arsenio Paixão Bano aktual Prezidente Autoridade ba Rejiaun Administrativu Espesial Oe-Kusi Ambeno (RAEOA) no ZEESM-TL, tanba arguidu sira komete kazu krime ofensa integridade fizika simples ne’ebé previstu iha art.145 konjugadu ho art.30/2 husi kodigu Penal Timor-Leste nian hasoru lezadu Domingos Nesi.
Antes ne’e iha julgamentu Tribunal hare katak, krime ne’e nia natureza semi públiku lei fó dalan atu liu husi tentativa konsiliasaun, maibé husi parte lezadu la aseita, tanba ne’e maka hakat ba iha prosesu julgamentu.
Entretantu kazu ne’e akontese iha tinan 2019, no prosesu ba kazu ne’e hahu ona julgamentu iha loron 8-9 Jullu foin lalais, no kontinua iha loron 24 Jullu ora tuku 3:00 no ikus leitura sentensa hala’o iha loron segunda 24 agusto 2020 oras tuku 2:00.
Tribunal Ambeno lei sai leitura sentensa ne’e ho provas kompletu, husi atestadu médiku no provas seluk hanesan imajen (foto) no, mós sasin nain 3 deklara ho faktu sira hatudu katak arguidu sira ataka lesuk lezadu ne’e no kauza ran sai husi inus, bubu no kanek boot. Maibé, durante iha audensia julgamentu arguidu sira nega total faktu ho sira nia sasin nain 2 seluk no ida hili dalan nonok, Tribunal rona ona deklarasaun husi arguidu no lezadu ho sasin sira, prova barak hato’o husi lezadu no sasin sira, maibé arguidu ho nia sasin nafatin nega faktu sira ne’e.
“Tanba ne’e Tribunal konsidera kazu ne’e aprovadu, tanba arguidu ho sasin sira nega total faktu sira, Tribunal konsidera hahalok ida ne’e arguidu sira komete krime hanesan ko-autor material ho forma konsumada ba krime ida ofensas integridade fizika simples tuir art.145 KP. konjugadu ho art.30/2KP, katak tenki aplika pena tuir art. Ne’e”. deklara juiz singular Hugo da Cruz Pui bainhira le leitura sentensa ba arguido sira iha audensia julgamentu Tribunal Oe-Kusi Ambeno.
“Ohin Tribunal hatun sentensa ba arguidu sira, primeiru selu indemnizasaun naun patrimonial dolar Americano $700.00 ba Tribunal, no kondena mós selu judisiariu ba arguidu Arsenio Paixão Bano selu $120.00, arguidu Paulo Jorge da Costa Denis selu $40.00, arguida Sanchia Florência Paixão Bano selu $70.00 no arguidu Luis Armando Sequeira da Cruz Pina selu U$70.00,” juíz Hugo da Cruz Puis le’e sai sentensa ne’e iha Tribunal Distrital Oe-Kusi Ambeno, Segunda 24 Agustu 2020.
“Tribunal konklui katak komete duni krime fizika simples i kondena arguidu sira pena prizaun, pena multa, iha liur de’it la’os ba Bekora, ba arguidu Arsenio Paixão Bano pena prizaun fulan 5 suspende tinan ida, arguidu Paulo Jorge da Costa Denis pena prizaun fulan 9 suspende tinan 1, arguida Sanchia Florência Paixão Bano hetan pena prizaun tinan 1 suspende ba tinan 1, no arguidu Luis Armando Sequeira da Cruz Pina hetan pena prizaun tinan 1 fulan 6 suspende ba tinan 2, tanba ulun fatuk to’os mai iha tribunal dalarua ona, kastigu mós tenki sae tan,” deklara Tribunal ambeno liu husi Juiz singular Hugo da Cruz Pui.
Kazu ne’e akontese iha loron 2 Juñu 2019, oras tuku 6:30 kalan iha bairo padimau aldeia Sanane suku costa postu administrativu pante makasar. Ho nia motivu akontese, bainhira lezadu (Domingos Nesi) ba hola pulsa elektrisidade uma nian iha edifisiu EDTL ambeno. No hetan ataka husi arguido nain 4 ne’e ataka lesuk lezadu ne’e ho razaun lezadu tolok arguido APB iha nia residensia.
Tuir akuzaun MP Oe-kusi ambeno nian katak, Arguido sira hala’o krime ne’e ho livre deliberada konsientemente aproveita situasaun ne’ebé adekuadu kauza lezadu sofre kanek, ran, moras, bubu kontra lezadu nia vontade. Arguido sira hatene katak sira tuku, tebe, buti kakorok buti ema seluk nian kauza kanek ran bubu moras no iha posibilidade halo perigu ba ema seluk nia vida, no arguido sira hatene katak hahalok ne’e lei bandu no sira hatene sei hetan kastigu tuir lei art. 145 KP. konjugadu ho art.30/2KP.
Audensia julgamentu ba kazu ne’e prizide husi Juiz singular Dr. Hugo da Cruz Pui, ministerio Públiku reprezenta husi Prokurador Dr. Pedro Baptista maibé la partisipa, no arguidu sira hetan asisntesia legal husi advogadu privadu Daniel Elo ho João Dun.
