HORTA (TOP) – Durante periodu Estadu emerjénsia nia laran, traballador hamutuk nain 79 mak sakrifika aan tomak iha liña oin (front line) hodi fornese ai-han no seguransa ba pasiente sira iha Hospital Referal Oe-Kusi Ambeno, infelizmente to’o oras ne’e la hetan subsidiu maske parte kompetente halibuar tiha ona sira nia dadus pessoal.
Traballador nain 79 ne’e mai husi kompañia 3 hanesan, Star Security, Nabilan Cleaning Service no Nidela Food catering.
“Govenu implementa Estadu emerjénsia iha teritóriu Timor-Leste, funsionáriu públiku ho privadu barak mak deskansa iha uma de’it. Ami kontinua hala’o serbisu nafatin to’o ohin, maibé la hetan subsidiu,” hatete Virgilio de Oliveira Martins nu’udar porta voz ba ema nain 79 liu husi konferénsia ba imprensa iha bairu Horta, suku Costa, postu Pante Macassar, Oe-Kusi Ambeno, Kuarta 29 Jullu 2020.
Razaun sira ezije, tanba molok implementa Estadu emerjénsia, parte hospital “promete ona” ba sira atu hetan osan subsidiu Covid-19 nian, maibé to’o ohin loron seidauk hetan.
“Primeiru husi diresaun hospital referral Oe-Kusi Ambeno rasik, sira rekoella ona ami nia dadus dehan atu hetan subsidiu ne’e, maibé to’o ikus mai ami nia maluk funsionáriu públiku sira simu ona sira nia direitu osan Covid-19 nian, maibé ami traballador hein fulan 3 liu ona sedauk simu,” afirma porta voz ne’e.
Administrador Hospital Referal Oe-Kusi Ambeno, Manuel da Cos ta. Foto The Oe-Kusi Post/Abilio Elo Nini.
Hatan ba ezijensia ne’e administrador Hospital Referal Oe-Kusi Ambeno, Manuel da Costa katak, implementasaun atu hetan renumeratóriu ba subsidiu Covid-19, governu hasai ona rezolusaun Númeru13/2020 loron 12 Maiu iha definisaun ona se mak iha direitu atu hetan subsidiu ne’e.
“Agora iha Estadu emerjénsia Fronliner sira mak hala’o aktividade, seluk laiha ligasaun sira bele hakmatek iha uma, kolega sira ne’ebé hala’o serbisu iha hospital tantu seguransa ho cleaner, no mós fornesimentu hahan ne’e iha balun ,liliu ba parte limpeza nian ne’e sira halo mós rotativu ba serbisu, jadi semana ida mak foin bele hala’o dala ruma loron 3 mak tama fali,” esplika Manuel.
“Signifika kompañia orienta sira para tenki deskansa, no mós tenki asegura limpeza iha hospital, seguransa sira mós hanesan rotativa ho food catering, ida ne’e ita rekoñese mais iha rezolusaun mensiona katak kolega sira ne’ebé fornesimentu privada sira labele hetan subsidiu ne’e,” nia afirma.
Nia rekoñese antes ne’e parte hospital rekoella ona dadus traballador sira, no hato’o duni ona ba governu sentral iha Ministériu Saúde atu konsidera traballador sira ne’ebé serbisu iha parte limpeza, seguransa no fornese hahan ba pasiente sira iha hospital.
“Ami aprezenta ba iha Ministériu saúde hodi konsidera mais depois ultimo iha ona implementasaun kolega sira ne’e lahetan, mais parte hospital rekolla lista no halo proposta ba iha sentral, agora frontliner sira ne’ebé mak halo atendimentu direita no indireita, direita mak hanesan sira ne’ebé mak serbisu iha triazen, izolamentu, laboratorium no karantina ne’e mak hetan atendimentu direita, iha atensaun mós ba indireita entaun kolega seguransa sira mós halo rotasaun serbisu ne’ebé mak iha la’os lor-loron ativu,” nia esplika.
Author: Abilio Elo NiniWebsite:www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
