SANTA ROSA (TOP) – Prosesu julgamentu ba kazu agresaun fiziku ne’ebé involve arguidu nain 4 iha Oe-Kusi Ambeno kontinua la’o, maibé pessoal médiku ne’ebé fó atendimentu ba lezadu iha sala emerjensia nega total dokumentu atestadu médiku ne’ebé nia rasik hasai iha tempu ne’eba.
Agnes Bene Bana nu’udar pessoal médiku ne’ebé halo tratamentu saúde ba lezadu Domingos Nesi katak bainhira lezadu tama ba halo tratamentu iha sala emerjensia, nia hare lezadu ho kanek kaman de’it, la’os ho kondisaun kanek todan.
“Bainhira tama iha sala emerjensia vitima nia isin diak hela, signifika kanek ko’es de’it mak barak iha inus, tilun parte karuk no kakorok, hirus matan,” deklara sasin Agnes Bana ba Tribunal durante audiensia julgamentu iha Tribunal Oe-Kusi Ambeno, Sesta 24 Jullu 2020.
Deklarasaun pessoal saúde nian ne’e kontrariu ho dokumentu atestadu médiku ne’ebé hasai iha tempu ne’eba. Dokumentu atestadu médiku relata lezadu hetan kanek todan, maibé pessoal saúde ne’ebé fó atendimentu ba lezadu ne’e katak iha tempu ne’eba nia kanek ko’es de’it.
Hafoin médiku konta hotu, MP husu ba sasin ne’e hodi halo diferensia entre kanek kaman no kanek todan, tanba tuir dokumentu atestadu médiku ne’ebé sasin rasik mak halo iha tempu ne’eba katak lezadu kauza kanek, moras, bubu no ran sai, maibé sasin Bana deklara fali iha Tribunal katak lezadu kanek koes de’it.
“Sim ha’u mak halo karta ne’e no asina,” hatan sasin Agens Bana ba pergunta MP nian durante audiensia julgamentu.
Dokumentu atestadu médiku ne’e produz no asina huis sasin Agnes Bana nu’udar pessoal médiku ida iha hospital referal Oe-Kusi Ambeno, maibé nia deklara ba Tribunal katak nia mak hakerek sala atestadu médiku ne’e.
“La’e, ha’u mak hakerek sala”.
Ho kazu agresaun fiziku ne’e, Ministériu Publiku (MP) akuza arguidu APB ho nia maluk arguidu sira seluk ho krime ofensas integridade fizika simples iha kódigu penal artigu 145 konjugadu ho artigu 30/2.
Iha akuzasaun ne’e MP husu ba Tribunal atu fó pena prizaun másimu tinan 3 no tinan ida ba arguidu sira, no husu mós atu aplika pena multa ba lezadu.
Akuzasaun MP nian katak, akuza arguidu sira nu’udar ko-autor material ho forma konsumada ba krime ida ofensas integridade fizika simples tuir art.145 KP, konjugadu ho Art. 30/2KP.
Iha julgamentu ikus nian ne’ebé hala’o iha loron Sesta 24 Jullu, Tribunal rona tan sasin ida husi lezada Maria Graciana Aneka Nheu ne’ebé deklara iha Tribunal katak nia la hare arguidu nain 4, maibé rekoñese hare lezadu inus no ibun ran sai.
“Ha’u la hare arguido nain 3 seluk depois ida ne’e ha’u la’o liu ho motor, ha’u hare lezadu inus ran no ibun ran depois lezadu husu tulun mai ha’u, maibé ha’u tauk la’o liu tiha,” deklara sasin Aneka ba Tribunal.
Entretantu, deklarasaun husi sasin arguidu sira nian, Eduardo Coreia katak nia hare lezadu iha tempu ne’eba ho kondisaun lanu todan no hakilar maka’as iha edifisiu EDTL nia oin.
Sasin Kandido Tefa deklara iha tempu ne’eba nia hare ho matan bainhira arguidu APB mak tuku, no tebe lezadu to’o monu iha baleta kuak.
“Depois mak arguidu Arsenio hi’it sai, no rasta tama ba uma laran, maibé la konsege, tanba ha’u hare lezadu ka’er metin portaun atu tama ba arguidu Arsenio nia uma,” deklara sasin iha loron 8 Jullu 2020.
Hafoin Tribunal rona hotu tiha deklarasaun sira ne’e, juís singular Tribunal Ambeno, Hugo da Crus Pui deklara, tanba kazu ne’e involve ema barak, nune’e sei presija tempu loron 30 atu tetu molok halo leitura sentensa ba alegasaun final, no leitura sentensa ne’e sei hala’o iha loron 24 Agostu 2020 iha oras tuku 2:00 lorokraik.
Arguido APB deklara nia la’os kriminozu
Sasin barak mak fó ona deklarasaun iha Tribunal katak sira hare ho matan bainhira arguidu APB ho nia maluk arguidu nain 3 seluk baku, tuku-tebe, no rasta lezadu Domingos Nesi iha tinan 2019, maibé hafoin MP le’e sai akuzasaun final, arguidu APB deklara ba Tribunal katak, nia la’os ema kriminozu.
Notisia relevante: Arguidu APB ho arguidu nain 3 ataka lesuk mestre ida
“Ha’u haraik aan no hakruk ba Tribunal atu deklara ba Tribunal katak ha’u mai iha fatin ne’e (Tribunal) foin primeira ves tuir julgamentu, ha’u hakarak hatete, ha’u la’os ema kriminozu, no ha’u ema politiku,” deklara arguidu APB ba Tribunal.
“Ha’u iha fen-oan, maibé nunka halo violénsia doméstika ba sira ka halo keixa ba ha’u, tanba ha’u nunka halo problema ho ema ida”.
Notisia relevante: Sasin Petronela hare arguidu sira ataka lejadu.
