SANTA ROSA (TOP) – Prosesu julgamentu ba kazu agresaun fiziku ne’ebé involve arguidu nain 4 kontra lezadu Domingos Nesi tama ba loron daruak, Tribunal kontinua rona deklarasaun sasin sira tantu husi lejadu no arguidu nian.
Notisia relevante: Arguidu APB ho arguidu nain 3 ataka lesuk mestre ida
Arguidu sira arolla sasin lubuk ida hodi defende sira nia aktu sira iha Tribunal. No, tuir sasin Angêlo dos Santos Bano deklara ba Tribunal katak, iha tempu ne’eba nia lahatene problema nia hun ne’e mak saida loos, maibé foin hatene fali husi arguida SFPB alias MB bainhira telefone ba nia hodi ba hare lejadu ne’ebé tuir arguida ne’e katak nia tolok hela arguidu APB iha nia uma oin.
Sasin ne’e hatutan, hafoin simu kontaktu via telemovél husi arguida MB ne’e, nia mós hakat kedas ba arguida APB nia uma. To’o ne’eba, nia konsege hakalma tiha lejadu no nain rua konversa ba malu, maibé la hare no la rona lejadu tolok no hakilar hasoru arguidu APB. Informasaun dehan lejadu tolok no hakilar arguidu APB ne’e, sasin ne’e deklara ba Tribunal katak nia rona tutan husi arguida MB.
Maske sasin Angêlo dos Santos Bano deklara dehan la hatene no la hare lejadu tolok no hakilar iha tempu ne’eba, maibé sasin Rui Filomeno Paixão Bano deklara katak iha tempu ne’eba nia hare ho matan lejadu tolok hela arguidu APB, no rekoñese nia duni mak losu sai tiha lejadu nia sabi motor ho rajaun atu fó dalan ba transporte sira seluk hodi liu, tanba tuir nia katak, iha tempu ne’eba lejadu hamrik loos iha estrada klaran mak tolok no hakilar arguidu APB.
Akuzasaun Ministériu Públiku nian katak, ho asaun husi arguidu nain 4 ne’e rezulta lejadu kanek barak hanesan isin bubu, no ran sai husi inus, maibé sasin ne’e dehan iha tempu ne’eba nia la hare ema ruma baku lejadu, no mós la hare lejadu isin bubu no ran sai.
Sasin ikus husi arguidu sira nian mak Carlos Hermenegildo da Costa nu’udar rian husi arguidu APB, maibé nia hili dalan nonok hodi lakohi deklara ba Tribunal kona-bá kazu ne’e.
Sasin sira husi parte arguidu nian deklara, balun hare no balun la hare, maibé sasin husi parte lejadu nian, Petronela da Costa konfesa ba Tribunal katak, iha tempu ne’eba nia ba sosa pulsa eletrisidade iha edifisiu EDTL no hare Rui Filomeno Paixão Bano mak hadau tiha lejadu nia telefone, no hare mós arguida MB uja telefone basa dala rua ba lejadu nia inus.
“Ha’u tauk la’o liu ba TELEMOR hodi telefone ba mestre nia familia sira. Ha’u telefone tiha ba fali hare hetan APB tun husi kareta langsung buti lezadu nia kakorok rabat ba kareta,” deklara sasin Petronela ba Tribunal Distrital Oe-Kusi Ambeno iha Santa Rosa, Kuarta 8 Jullu 2020.
Sasin ne’e mós hatutan, liu tiha ida ne’e nia hare arguidu sira komesa baku lesuk ona lejadu, no nia hare ran sai barak ona husi lejadu nia inus. Hafoin polisia to’o fatin akontesementu hodi salva lejadu ne’e, sasin Petronela tanba sente tauk ona, nia desidi halai ba nia uma.
Hafoin rona tiha deklarasun hirak ne’e, Tribunal desidi sei kontinua rona tan deklarasaun sasin sira husi parte lejadu nian no kontinua halo alegasaun final ba kazu ne’e iha loron Segunda 20 Jullu 2020 oras tuku 2 lorokraik.
