SANTA ROSA (TOP) – Prezidente Autoridade ba Rejiaun Administrativu Oe-Kusi Ambeno (RAEOA), Arsenio Paixão Bano promete ona konstrusaun ba estrada urbana liga ba sub-rejiaun Oe-Silo no Nitibe sei hahu halo iha tinan 2021.
"Planu prioridade bee moos, estrada rural, eskola, saúde, edukasaun, no estrada husi eis Merkadu Tono ba Oe-Silo parese osan sei iha, no mós estrada ba Nitibe tenke iha ona proposta atu hahu, ita iha dana Covid-19 itoan ita bele gasta ba buat rua nee," hateten Bano ba The Oe-Kusi Post (TOP) hafoin remata enkontru preparasaun planu annual ba tinan 2020-2021 ne’ebé hala’o iha salaun edukasaun solidariedade sosial iha Santa Rosa, Oe-Kusi Ambeno, Tersa 30 Juñu 2020.
Nia hatutan, planu nivel orsamentu ho planu anual ne’e hahu iha fulan Juñu ba to’o Dezembru 2020. Ita sei ba aprezenta iha parlamentu karik ba Konsellu Ministru sira kona -ba prioritizasaun.
"Tanba ne’e mak ha’u husu estrada Nitibe mai vila tenke halo. Estrada ba Oe-Silo tenke halo iha planu tinan rua ne’e, tanba ita nia prioridade uluk mak estrada vila tenki liga ona ba postu sira nee,” Bano promete.
Nia dehan estrada liga ba Besa Toko sa’e to’o suku Lela-Ufe tun fali ba Citrana (suku Bene-Ufe) nian mós sei halo hotu, tanba konsidera área hirak ne’e nu’udar movimentu esensial ba dezevolvimentu ekonomia iha rai-ketan ne’e.
Bano esplika, investimentu sira iha Oe-Kusi Ambeno tenke halo ho bee moos iha área rural sira no estrada rural, inklui eskola no saúde. Tanba ne’e nia promete sei estabelese uluk EBC foun rua iha Pasabe, ida iha suku Abano, ida seluk iha suku Malelat depois mak halo tan iha Nitibe.
Kona-bá dezenvolvimentu parte saúde nian, Bano dehan nia iha ona hanoin atu harii tan sentru saúde ida iha suku Costa laran, tanba durante ne’e iha ida de’it mak iha suku Naimeko. Nune’e, nia planeia ona atu halo levantamentu ba eis komarka iha área Kiub Manu Teko (Kiu Maon Teko) ne’ebé lokaliza iha suku Costa atu harii tiha sentru saúde ida iha fatin ne’e.
