PALABAN (TOP) – Governu liu husi Ministériu Solidaridade Sosial no Inkluzaun (MSSI) hamutuk ho autoridade Rejiaun Administrativu Espesial Oe-Kusi Ambeno (RAEOA) fó ona formasaun badak id aba xefe suku nain 18 no xefe aldeia nain 63 molok simu subsidiu $200 ba kada uma kain iha rai-ketan ne’e.
Formasaun ne’e la’o durante loron rua ne’ebé hahu ona iha loron ohin, no sei remata iha loron Kinta aban. Formasaun ne’e ho tema “Sosializasaun Apoiu Monetariu ba Uma Kain Iha Ambitu Pandemia COVID-19 ba Komponente Autoridade RAEOA”.
Prezidente Autoridade ba RAEOA, Arsenio Paixão Bano senti kontenti tanba osan subsidiu ne’e mai ajuda komunidade sira, tanba durante ne’e sirkulasaun osan iha rai-ketan ne’e la dun la’o, no afeta komunidade sira halo tusan barak.
“Ita serbisu sei barak, osan subsidiu ne’e hanesan hahu de’it ne’e ha’u kontenti tanba osan ne’e mai pas-pas, tanba barak mós atu selu de’it tusan, jadi osan tusan mós barak. Ha’u husu ba xefe suku sira, jestor no diretór sira ne’ebé mak halo akompañamentu para ita nia komunidade hetan hotu osan ne’e,” hateten Bano liu husi nia diskursu bainhira loke formasaun ne’e iha salaun alfandega Palaban, Oe-Kusi Ambeno, Kuarta 1 Jullu 2020.
Total uma kain iha Oe-Kusi Ambeno hamutuk 20.033, no osan ne’ebé aloka ba ne’e kuaje milliaun $4.
Bano konfia katak, hafoin komunidade sira simu subsidiu ne’e sei ajuda netik sirkulasaun roda ekonómia doméstika iha rai-enklave ne’e, maibé nia mós garante katak osan ne’e mós sei hotu lalais de’it iha tempu balun nia laran, depende ba kada uma kain ninia jestaun.
Bano halo estimasaun katak, presija loron 10 atu finalize prosesu fahe subsidiu $200 ba uma kain sira iha Oe-Kusi Ambeno, no prosesu distribui subsidiu ne’e sei hahu iha loron Sábadu, 4 Jullu 2020.
Iha fatin hanesan, Diretór Jeral Diresaun Solidariedade Sosial no Inkluzaun, Rui Exposto katak, objetivu husi sorumutu loron rua nia laran, atu ajuda transmite informasaun ba autoridade lokal sira atu intende didi’ak kona-ba direitu simu subsidiu ne’e oinsa, no depois mekanizmu rekomendasaun no reklamasaun ba subisiu ne’e nian.
Expostu hatutan, bazeia ba dekretu lei númeru15/2020 no diploma ministeriál konjuntu númeru18/2020 nian katak pagamentu subsidiu ne’e rasik sei implementa husi ekipa pagamentu ida ne’ebé kompostu husi MSSI, xefe suku no xefe aldeia, no mós pessoal administrasaun apoiu suku, no Ofisial Polisia Suku (OPS) nian.
