Ema nain 83 buka ona dalan keixa Arsenio Bano

Funsionáriu kontratadu nain 83 hakat ona ba edifisiu PDHJ Oe-Kusi Ambeno hodi husu dalan molok hato'o keixa kontra Prezidente Autoridade ba RAEOA, Arsenio Paixão Bano. Foto The Oe-Kusi Post/Jefriano Oqui.

PALABAN (TOP) – Funsionáriu kontratadu hamutuk nain 83 ne’ebé Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano tebe sai ona husi nia gabinete, sei hato’o keixa ba instituisaun relevante sira, tanba konsidera desijaun ne’e viola lei.

Funsionáriu kontratadu hamutuk nain 83 ne’ebé rekruta husi eis Prezidente Autoridade, José Luis Guterres ‘Lugu’ iha tempu hirak liuba, Bano hapara ona sira nia kontratu iha loron Segunda 29 Juñu 2020. Ema nain 83 ne’e mai husi partidu CNRT, PLP no KHUNTO.

Molok hato’o keixa, iha loron kuarta 1 Jullu 2020, Ofisial Lojistika RAEOA, Teofildo Elo ne’ebé mós hapara ona nia kontratu, lidera nia maluk sira hakat ba edifisiu PDHJ Oe-Kusi Ambeno hodi husu no buka dalan, molok hato’o keixa.

“Ohin ami mai konfirma iha ne’e buka dalan hodi hatama keixa kona-ba terminasaun kontratu ne’e,” hateten Teofildo ba The Oe-Kusi Post (TOP) iha edifisiu PDHJ Oe-Kusi Ambeno, Kuarta 1 Jullu 2020.

Hatan ba kestaun ne’e, Arsenio Bano aproveita xefe suku nain 18, no xefe aldeia nain 63 hodi deklara ba sira katak, nia sei la preokupa ba kritika sira kona-ba nia desijaun hapara funsionariu kontratadu nain 83 ne’e ho rajaun ema hirak ne’e mesak manan osan boot de’it, maibé la dun halo serbisu barak.

“Ha’u la ko’alia ba ema manan osan rihun 5 to’o rihun 8 hanesan ha’u hasai tiha balun manan osan boot hanesan ne’e, ha’u la preokupa ema kritika ha’u tanba de’it hasai ema manan osan boot la halo servis,” Bano esplika.

“Ha’u preokupa liu mak ema seidauk iha osan dollar ida, centavos 0,50, no centavos 0,25 la iha loron ida. Ema balun kritika ha’u hasai ema 83 la serbisu imi bele kritika to’o fali tinan oin mós ha’u la sibuk ida, tanba ha’u preokupa liu osan sirkula iha kraik ne’e mak importante,” Bano afirma.

“Ha’u hasai ema balun nomeasaun politika sira ne’e normal. O nia boot hotu, ita hasai tanba osan mós la to’o atu selu ema sira ne’e hotu, sira barak liu balun simu maka’as liu, osan sai barak liu, sai selu asesor ne’ebé ha’u desidi termina sira nia kontratu, tanba Oe-Kusi presija liu osan ba dezenvolvimentu”.

 

Entretantu, antes ne’e eis Prezidente Autoridade RAEOA, José Luis Guterres ‘Lugu’ hafoin simu posse iha Novembru 2019, no depois ba Oe-Kusi Ambeno nia konsege detekta funsionáriu hamutuk 700 mak tama serbisu iha administrasaun públika Oe-Kusi Ambeno ho kartaun militante partidu nian, maibé iha tempu ne’eba kedas Lugu promete katak nia sei la hasai ema hirak ne’e, tanba sira mós Timor oan, Ambeno nia oan sira ne’ebé iha direitu atu asesu ba serbisu ba administrasaun públika sira iha rai-laran. No ema hirak ne’e kontinua serbisu iha Oe-Kusi Ambeno to’o ohin loron, maibé nain 83 ne’ebé tama iha Lugu nia tempu oras ne’e tenke lakon serbisu ho rajaun primeiru tanba simu osan boot, no rajaun segundu ema sira ne’e la’os mai husi partidu FRETILIN, maibé sira mai husi partidu CNRT, PLP, no KHUNTO.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter