Komandante Mateus Mendes troka komandante Arnaldo iha Ambeno

Komandante polisia munisipiu Ermera, Superintende Xefe Mateus Mendes (liman loos) troka fali ona komandante polisia RAEOA, Superintendente Xefe Arnaldo de Jesus Araújo (karuk). Foto The Oe-Kusi Post/Abilio Elo Nini.

SANTA ROSA (TOP) – Eis komandante polisia munisipiu Ermera, Superintende Xefe Mateus Mendes troka fali ona komandante polisia Rejiaun Administrativu Espesial Oe-Kusi Ambeno (RAEOA), Superintendente Xefe Arnaldo de Jesus Araújo.

Komandante Arnaldo simu kna’ar nu’udar komandante PNTL ba RAEOA iha loron 27 Abril 2013, no substitui ona iha loron 6 Jullu 2020.

Iha seremónia entrega serbisu ba komandante foun, komandante Arnaldo hakat ba nia membru sira hodi hakuak sira ho tanis, no hamenon hela ba sira atu serbisu ho disiplina. 

Komandante Arnaldo de Jesus Araújo despede hela nia membru sira iha kuartel polisia Oe-Kusi Ambeno, Segunda 6 Jullu 2020. Foto The Oe-Kusi Post/Abilio Elo Nini.

“Serbisu di’ak nafatin, hatudu imi nia disiplina saida mak ita hala’o ona tinan barak,” hateten komandante Arnaldo ho matan been bainhira hakuak nia membru sira iha kuartel PNTL Oe-Kusi Ambeno, Segunda 6 Jullu 2020.

Entretantu iha nia diskursu dala ikus nian hodi fahe atu hit ain sai husi oe-kusi ambeno ho laran kontenti tamba tinan 7 hamutuk ho povo iha ketan neba kooperasaun diak tebes.

Nia hatutan, bainhira koloka hala’o serbisu iha Oe-Kusi Ambeno durante tinan 7 nia laran, 2013-2020 iha kooperasaun di’ak tebes ho povu sira iha Ambeno, no ladun mosu problema boot iha rai-ketan ne’e kompara ho munisipiu sira seluk.

Mudansa ne’e mós troka hotu adjuntu komandante sira hanesan, adjuntu komandante asistente Paulino do Carmo Pereira troka husi Superintendente Nicolau da Costa.

Iha fatin hanesan, komandante Mateus Mendes agradese tebes ba komandante Arnaldo ho nia membru sira ne’ebé durante tinan 7 konsege hakat liu obstaklu balun.

“To’o ohin loron entrega fali mai ha’u la fasil ha’u mós hasoru obstaklu oi-oin iha fatin ne’ebé ha’u serbisu ba normal iha fatin foun iha ema balu gosta no balu la gosta ita. Balu disiplina, balu la’e ne’e normal, maibé to’o ohin ita nia responsabilidade mak ita tenke serbisu hamutuk ida ne’e mak importante,” esplika komandante Mendes. 

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter