Oekusipost.com Ambeno – Progresu kontrusaun edifisiu administrasaun Rejiaun Administrasaun Espesial Oe-Kusi Ambeno (RAEOA) ne’ebé “abandonadu” no foin to’o pur sentu 40 (40%), maibé nia kuadru avizu ne’ebé kontein informasaun kona-bá durasaun projetu no total osan oras ne’e ema lees sai tiha ona ho rajaun la klaru.
Iha loron 1 Abril liuba Oe-Kusi Post públika notisia ida kona-bá progresu fiziku konstrusaun ne’e ho títulu Konstrusaun Edifisiu Administrasaun RAEOA "Abandonadu" no iha loron 2 Abril Kuadru Avizu Administrasaun RAEOA Nakles Fahe Rua. Ikus lius oras ne’e laiha ona.
Tuir Xefe Gabinete Prezidente Autoridade ba RAEOA, Agustinho Caet hateten, autoridade fó atensaun ona atu extende tan nia kontrato tanba obra ne’e extende dala 3 ona, maibé sedauk hotu hela de’it
“Foin dadauk sira mai ko’alia ho Prezidente Autoridade, tanba sira extende dala 3 ona, maibé to’o agora ita seidauk simu informasaun, maibé nia tenke fó jaminan, katak extende ida ne’e depois remata ona konstrusaun nee. Sira mak husu para extende, tanba razaun finanseiru ho jestaun. Se nia mai la lori osan pelu menus iha jestaun ne’ebé di’ak, ne’ebé to’o autoridade hein para haruka karta ida mai ho garantia ida,” hateten Caet ba Oe-Kusi Post iha Oe-Kusi Ambeno, Kinta 23 Abril 2020.
Prosesu konstrusaun ba edifisiu administrasaun Rejiaun Administrativu Oe-Kusi Ambeno (RAEOA) ne’ebé tuir loloos tenke hotu iha fulan Agostu tinan 2018, maibé to’o ohin loron sai "abandonadu" tiha, tanba tama ona fulan Abril tinan 2020 mós projetu ne’e foin mak to’o pur sentu 40 (40%).
Nune’e, Diretór Obras Públiku RAEOA, Candido Dos Reis Amaral justifika, projetu ne’e la konsege priense durasaun kontratu ne’ebé iha, tanba maioria material husi konstrusaun ne’e mai husi rai liur ne’ebé kontribui maka’as hodi halo projetu ne’e labele hotu tuir tempu kontratu. Valor osan ba projetu ne’e hamutuk $ 190, 900,99.37.
“Edifisiu ne’e agora la’o hela. Progresu ne’ebé mak identifikadu husi parte fizikal to’o agora 40%,” hatete diretór Candido ba Oe-Kusi Post iha Oe-Kusi Ambeno foin lalais.
Diretor Candido mós rekoñese projetu ne’e lakonsege hotu tuir durasaun kontratu nian, maibé ho diplomasia katak serbisu balun besik atu hotu ona hanesan estrutura edifisiu nian hotu ona, no ida ne’ebé seidauk hotu mak dezeñu iha laran (interior design) inklui serbisu ki’ik oan balun tan.
