Oekusipost.com Padimau – Durante periodu Estadu emerjénsia, folin kombustivél liliu gazoliña sa’e maka’as tebes, tanba fornesimentu mina husi área fronteira sira iha rai-ketan ne’e taka total, atividade negósiu laiha, liliu negosiante kombustivél.
Ho situasaun ne’e provoka folin gazoliña iha aqua boot ida nanotak (litru ida) ne’ebé antes ne’e iha tempu normal ho folin $1.25 centavos sa’e tiha ba $2.50 centavos, no aqua boot ida nakonu ka litru rua ne’ebé iha tempu normal nia folin $1.50 sa’e tiha ba $5.
Situasaun ne’e halo komunidade sira ezije ba Autoridade hodi buka solusaun. No iha iha semana kotuk kedas, Prezidente Autoridade RAEOA, José Luis Guterres (Lugu) sai husi Ambeno ba rai-boot, Dili hodi buka solusaun, ikus mai konsege transportante tiha ona kombustivél tonelada lubuk ida ba rai-ketan ne’e hodi hatan ba ezijensia komunidade sira.
Nune’e iha loron Kinta 23 Abril 2020 lorokraik, Prezidente Autoridade RAEOA, Lugu hamutuk ho ro SUCCESS lori kombustivél hirak ne’e ba Oe-Kusi Ambeno. Hafoin to’o rai-enklave iha loron Sesta 24 Abril, nia desidi hodi fahe kedas gazoliña tonelada 12 ba iha estasaun kombustivél iha Padimau ho nia nain mak Seleiro Fuel Unipessoal, Lda no tonelada 12 seluk ba iha Sikluli.
Sesta dadersan de’it komunidade sira ho kareta-motor para nadodon no preparadu ona hodi hadau malu gazoliña iha estasaun kombustivél iha Padimau ho folin normal, litru ida ba $1.25 centavos no litru 2 ba $1.50 centavos.
“Fulan ida ona motor sira maran hotu. Ohin ita mai dudu malu hanesan tuir fali kompañia ne’e, governu mak lakohi halo jestaun para fahe ba fatin 5 ou 6 atu ita fahe malu, maibé la buat ida naran katak orsida bele hetan netik masa ida mós to’o ona,” hakilar motoristas sira iha kompañia Seleiro Fule Unipessoal, Lda iha bairo Padimau, Oe-Kusi Ambeno, Sesta 23 Abril 2020.
Entretantu, Perzidente Autoridade Lugu mós rekoñese durante periodu Estadu emerjénsia folin kombustivél ho sasan sira seluk folin a’as tebes hodi halo komunidade sira preokupa, maibé komunidade sira nafatin iha pasiensia hodi hein to’o oras ne’e iha netik kombustivél ona, falta nesesidade báziku sira mak seidauk bele mobiliza husi Dili ba Ambeno.
“Ha’u hatene katak alin sira iha Oe-Kusi laran triste, maibé ha’u nia ksolok tebes ba pasiensia povu Oe-Kusi Ambeno. Pasiensia tanba tempu badak la iha mina, no sira ko’alia, maibé ho respeitu ne’ebé ha’u respeita no hakruk ba iha povu Oe-Kusi nia matenek,” hateten Lugu ba Oe-Kusi Post iha Sikluli, Oe-Kusi Ambeno, Sesta 24 Abril 2020.
Lugu dehan, durante ne’e nia hatene moos kona-bá kestaun ne’e, maibé hetan ona solusaun balun, tanba husi nasionál fó ona autorizasaun hodi transporta kombustivél ba rai-enklave.
“Horseik ami mai ho ro ne’ebé ita lori hotu kombustivél mai. Ita hein katak, ida ne’e bele minimiza nesesidade ne’ebé povu Oe-Kusi Ambeno nian, no ita hein katak semana oin mai ka semana seluk ita bele iha tan esforsu sobre ida ne’e,” Lugu esplika.
Notisia relevante: Ro SUCCESS Transporta Ona Kombustivél Tonelada 26 ba Ambeno
Lugu hatutan, parte autoridade halo ona parseria ho empreza Versado Shipping ne’ebé disponivél ona atu lori kombustivél husi Dili ba Oe-Kusi Ambeno iha kada semana. No mós husu ona disponilidade balun ba emprezariu lokál sira iha Ambeno hodi bele partisipa iha prosesu balun liliu ba nesesidade báziku sira.
“Ami ko’alia mós ho setor privadu sira iha Oe-Kusi nian, ami hakarak mós fasilita sira ba saida mak hanesan autoridade bele halo para bele minimiza rezultadu situasaun emerjénsia ne’e,” nia esplika.
