KUTET (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano konsiente no rekoñese projetu rehabilitasaun estrada rural ne’ebé inagura ona husi Primeiru-Ministru, Taur Matan Ruak husi Bi-Hala ba to’o Kutet parte balun aat ona, tanba dezastre natural.
PM Taur ho Bano inagura estrada ne’e ho distansia 14Km husi aldeia Bi-Hala iha suku Bobokase ba to’o Kutet (suku Costa) iha loron Domingu 27 Novembru 2022. Estrada ho distansia 14KM ne’e ho nia folin mak U$ 2.623.959.80, infelizmente seidauk to’o tinan parte balun hahu nakfera ona, tanba deskonfia laiha kualidade no kauza mós husi dezastre natural.
Maske nune’e, Bano kontinua fó sala ba natureza mak kontribui halo aat estrada ne’e.
“Kutet ne’e riku soin ne’e maka’as bee mós nalihun iha fatin-fatin, ita halo estrada sai kaber tiha, seidauk to’o tinan estrada iha parte balun hahu a’at ona, ne’e tanba iha rai okos bee nalihun, entaun ha’u sei hadia Kutete sai fatin ne’ebé terbaik, iha Oe-Kusi Ambeno,” katak Bano ba jornalista sira iha bairo Usapi-Cruz, suku Costa, sub-rejiaun Pante Makasar Kinta, 19 Janeiru 2023.
The Oe-Kusi Post (TOP) observa, estrada ne’ebé a’at ne’e kuaje lubuk ida iha bairo Nenum ne’ebé estrada ne’e ameasadu atu kotu total ona.
Komunidade Kutet, Maria Co’e hateten, antes ne’e autoridade ho kampañia halo ona survey ba estrada ne’e atu to’o fronteira Nun-Ana, maibé kompañia serbisu ne’e to’o de’it mota Hau-Pahat.
“Estrada ne’e hahu husi Bi-Hala ba to’o Toi-Kok Naba ne’eba ne’e exkavator suru hotu, maibé to’o iha ne’e no halo saluran ne’e la to’o Nun-Ana, depois ponte balun mós la di’ak, uza de’it gaviaun ne’e ami komunidade Kutete preokupa tebes, bainhira loos mak kompañia kontinua obra ne’e to’o Nun-Ana,” Maria Co’e preokupa.
Antes ne’e mós, Xefe aldeia Mahata, Carlos Bana sente triste tebes, tanba governu gasta osan lubuk ida hodi halo estrada ne’e, maibé realidade hatudu inagura foin liu de’it loron 14, estrada ne’e hahu a’at fali ona.
“Estrada ne’e inagura iha semena kotuk, seidauk to’o tinan, maibé ita hare kondisaun estrada dodok fali ona, bee-dalan balun monu hotu ona, entaun ne’e signifika kompañia ne’e serbisu laiha kualidade,” hateten xefi aldeia Mahata, Carlos Bana.
Ho situasaun real ne’e, Bana ezije ba Bano atu husu ba kompañia Lifau Indah tenke halo manutensaun urjente ba estrada ne’e, tanba se la hadia mak iha tempu udan ne’e sei lori hotu ba mota.
“Estrada ida ne’e inagura direta husi Primeiru-Ministru, Taur Matan Ruak iha semana kotuk komesa a’at fali ona, tanba ita haree husi kondisaun rai, balun rai fatuk entaun simentu ne’e metin, maibé rai balun halai, estrada saluran no ponte sira mós aat dadauk ona. Liliu iha fatin ida naran Nenu ne’e estrada aat liu ona,” esplika Carlos Bana.
Iha tempu ne’eba, Bano konsege lalin membro governu lubuk ida hahu husi Primeiru-Ministru, Taur Matan Ruak, Ministru Justisa, Tiago Amaral Sarmento, Ministru ba asuntu Parlamentar no Komunikasaun Sosial (MAPKOMS ), Francisco Jeronimo, inklui deputadu sira husi Komisaun E ne’ebé trata asuntu infraestrutura mak ba halo inagurasaun ba estrada pedasuk ne’e.
