AMBENO (TOP) – Sekretariu Jeral Partidu FRETILIN, Mari Bim Amude Alkatiri konsidera, eleisaun parlamentar tinan ida ne’e povu mak tenke manan nune’e FRETILIN manan, tanba 2023 ba oin, tenki iha governu ida hatene katak rai ne’e atu lao ba oin tenki harii konsensu.
Alkatiri ne’ebé lori tinan lima dezenvolve de’it suku ha’at (4) iha Oe-Kusi Ambeno ne’e kontinua iha korazen hodi dehan, FRETILIN iha resposablidade atu lori naroman ba povu tanba tinan 20 depois restaura independensia ema balun hakarak lori nafatin nakukun ba povu, kontinua bosok.
“Elisaun tinan ida ne’e, konsidera hanesan Povu mak tenki manan nune’e FRETILIN manan, tanba 2023 ba oin, tenki iha governu ida hatene katak rai ne’e atu lao ba oin tenki harii konsensu,” hateten Alkatiri durante nia intervensaun iha enkontru ho kuadru FRETILIN Oe-Kusi Ambeno iha Arsenio Bano nia ofisina (Bengkel) no restaurante Noi-Liko iha bairro Padimau, aldeia Sanane, suku Costa, sub-rejiaun Pante Makassar, Oe-Kusi Ambeno, Sábadu 28 Janeiru 2023.
“Governu se de’it mak ukun tenki hatene ida ne’e, oinsa atu hasai povu husi ki’ak no mukit, la’os atu hetan de’it poder, tanba ne’e mak ha’u dehan povu mak tenki manan, bainhira povu manan, FRETILIN mak manan,” afirma Alkatiri.
Nia dehan, agora povu manan FRETILIN manan siginifika, tenki muda mentalidade, tanba demokrasia la signifika atu hatun malu, maibé demokrasia atu tau hanoin hamutuk para atu la’o ba oin, se hatun malu ikus liu povu mak terus no sofre.
Kona-ba plataforma intendementu entre FRETILIN,PLP, no KHUNTO tuir Alkatiri katak, sei iha komprimisiu pre-eleitorál katak, eleisaun ida – idak la’o ho nia bandeira, depois eleisaun mak sei hamutuk hodi ukun nafatin.
“Iha deit komprimisiu pre-eleitoral signifika saida? Ba eleisaun ida-idak ho nia partidu, ida-idak ba ho nia bandeira, eleisaun hotu, depois de kontagen votu, sei hamutuk fali ukun nafatin,” esplika Alkatiri.
Nia hatutan, durante tinan rua FRETILIN viabiliza governasaun Primeiru-Ministru, Taur Matan Ruak, hasoru situasaun difisil hanesan pandemia Covid-19, dezastre naturail, governu ida simu infraestrutura sira ne’ebé laiha kualidade, maibé esforsu atu hadia ho hanoin hodi lori naroman ba povu hanesan, uma naroman ba povu, fahe zinku/kalen ba povu, ferik-katuas sira nia subsidiu aumenta, insentivu ba autoridade lokal aumenta, fahe hahan (cesta básica) ba povu, subsidiu U$ 200, rehablita eskola, rehablita sede suku sira iha teritoriu nasionál, bolsa estudu ba povu nia oan.
Alkatiri nia vizita ba Oe-Kusi Ambeno ne’e akompaña husi Vise-Prezidente FRETILIN, Aniceto Guterres, Adjuntu Sekretáriu Jerál, Elizario Fereira, no simu husi membru CCF Arsenio Paixão Bano, Leonia Monteiro, Kordenador Komisaun Polítika RAEOA, OPMT, JF no organizasaun filiadas FRETILIN.
