AMBENO (TOP) – Empreza Estatal Indonézia, PT. Waskita Karya kontinua manan tan projetu hadia estrada ho distansia 16 iha Oe-Kusi Ambeno ho total orsamentu millaun US $23 hafoin halakon empreza rua iha prosesu tenderizasaun aberta ne’ebé hala’o husi autoridade Oe-Kusi Ambeno foin lalais.
Iha tinan 2014, empreza estatál Indonézia ne’e mós mak manan tenderizasaun hodi halo estrada no ponte sira husi Sakato-Sumlili (13Km), Sumlili-Pante Makasar-Airport (4Km), Airport-Lifau (3Km), no Lifau-Tono (2Km) liu husi dalan ajudikasaun direta (Single Source) ho nia total orsamentu millaun US $2,063,613.15.
Tuir dokumentu tenderizasaun ne’ebé The Oe-Kusi Post (TOP) asesu, projetu estrada ho distansia 16Km ne’e hahu husi ponte Noe-Fefan nia rohan ba to’o suku Suni-Ufe (Oe-Nunu) ne’ebé tama ba iha área sub-rejiaun Nitibe. Durasaun konstrusaun estrada ne’e sei lori de’it tempu fulan 22 tenke remata ona.
Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano hateten, rezultadu tenderizasaun ba projetu hadia estrada husi ponte Noe-Fefan ba to’o Oe-Nunu ne’e sai tiha ona, no sei hahu lansa ona ba públiku iha semana tolu tuir mai.
“Ohin ne’e ami hasoru malu ho jestor projetu (project manager husi kompañia internasional PT. Waskita Karya mai dahuluk prepara sasan hotu para nune’e ita hahu halo lansamentu ba estrada rural husi ponte Noe-Fefan to’o iha Oe-Nunu,” hateten Arsenio Bano ba jornalista sira hafoin remata hasoru malu ho jestor projetu PT. Waskita Karya iha Oe-Kusi Ambeno, Kuarta 03 Agustu 2022.
Bano hatutan, prosesu implementasaun hadia estrada ne’e sei afeta mós komunidade sira nia propriedade rai, maibé tuir nia katak, nia delega ona Sekretáriu Rejiaun Administrasaun no Sekretáriu Rejional Terras no Propriedade mak sei responsabiliza kona-ba kestaun ne’e.
“Ohin ami hasoru malu ho tekniku sira husi kompañia internasional PT. Waskita Karya hato’o kestaun rua de’it. Primeiru sira husu bainhira mak hahu halo lansamentu no asina kontratu, daruak mak bainhira ita hahu, maibé sei iha problema akizasaun ba rai, maibé autoridade forma ona ekipa ida atu halo serbisu kona-ba ida ne’e. Ha’u fiar katak komunidade iha suku Lifau, Taiboko no suku Suni-Ufe sei fó sira nia rai, tanba sira presiza estrada di’ak ba ita nia rai,” Bano esplika.
Kondisaun estrada husi parte Tono nian sa’e ba suku Bobometo iha sub-rejiaun Oe-Silo desde tempu okupasaun to’o ohin loron kontinua abandona, kondisaun aat tebes, maibé promete ona katak, semana oin tan mak foin anunsia empreza ne’ebé mak atu manan hodi hadia estrada ne’e.
Iha fatin hanesan, Jestor Projetu husi PT. Waskita Karya, Putu Hari promete sei involve komunidade lokal sira iha projetu estrada ne’e husi ponte Noe-Fefan to’o Oe-Nunu.
“Projeitu ne’e 50% ami sei buka povu Oe-Kusi Ambeno hodi serbisu iha kontrusaun estrada ne’e, maibé ami mós sei koordena ho ami nia tekniku sira atu presiza ema na’in hira, maibé ohin mós autoridade dehan tenki envolve povu Oe-Kusi mak barak liu,” nia esplika.
