NOEL EKAT (TOP) – Governu Koareanu liu husi Embaixador Korea Sul iha Timor-Leste, Kim Jeongho sei koopera ho governu Timor-Leste liliu Autoridade Rejiaun Administrativa Espesial Oe-Kusi Ambeno hodi kontinua buka tuir sarjentu Jeong Kin nia ruin, tanba durante tinan 19 ona seiduk hetan.
Iha Kinta foin lalais, familia husi Korea Sul akompaña husi embaixador Korea iha Timor-Leste Kim Jeongho no komandante batallaun ba matebian forsa Koreanu na’in lima, Kim Yeong Deok, presta homenazen ba forsa Koreano na’in lima iha monumentu jardin Oé-bau, Oe-Kusi Ambeno no monumentu Noel-Ekat iha suku Bobometo, sub-rejionál Oe-Silo.
Saudozu na’in lima ne’ebé mak mota lori iha Noel-Ekat ne’ebé lokaliza iha suku Bobometo sub-rejiaun Oe-Silo mak hanesan Letnan Koronel Byungjo Min, Letnan Kolonel Jin Kyu Park, Sarjentu Jong Hoon Back, Sarjentu Joeng Joong Kim, no Sarjentu Hee Choi.
Komandante batallaun ba matebian forsa Koreanu na’in lima, Kim Yeong Deok hateten, saudozu nain lima ne’ebé mak mota lori sira iha mota Noel-Ekat iha loron 06 Marsu 2003, tanba hala’o misaun manutensaun ba paz (Peace Keeping Force) husi Organizasaun Nasões Unidas (ONU) iha Oe-Kusi Ambeno iha tinan 19 liuba.
“Iha momentu espesial ida ne’e ha’u hateten ba autoridade RAEOA, katak ha’u sei esforsu koopera ho governo Timor-Leste no autoridade, no mós povu Oe-Kusi Ambeno hodi kontinua buka tuir sarjentu Joeng Joong Kim nia ruin, tanba familia husi sarjentu ne’e sei moris ho tristeza nia laran,” nia hateten embaixador Kim Jeongho.
Diplomata Koreanu ne’e konsidera sorumutu entre governu Korea Sul ho Timor-Leste iha iha laletek Noel-Ekat hanesan fatin ne’ebé tinan 19 liu ba, forsa Ever Green Unit nain 5 lakon sira nia vida iha fatin ida ne’e.
“Iha fatin ida ne’e kuaze liu ona tinan 19 maibé nia memoria sei la muda no sei fatin iha povu nia fuan. Informa katak ohin ita hotu mai hamutuk iha fatin ida ne’e atu presta omenazen ba dediakasaun tomak sira nain 5 husik hela liu husi monumentu ida ne’e, nune’e ho esperansa katak fatin ida ne’e sei sai fatin ba ema Korea no Timor-Leste hodi reflete no agradese rohan la’ek ba sira nia dedikasaun,” embaixador ne’e afirma.
Nia mós ba Autoridade RAEOA ne’ebé trata monumentu ida ne’e hanesan monumentu ba familia Koreanu sira nian.
“Ha’u lori governo Koreano hakarak agradese ba autoridade RAEOA tanba oferese ona fatin ida atu hari monumentu ba forsa na’in lima ne’ebé mate ba rai ida ne’e, no sempre kuidadu monumentu ida ne’e, no mós simu familia matebian sira bele mai sunu lilin no kari ai-funan ” nia hateten.
Entretantu, espoza saudozu Letnan Coronel Byungjo Min nu’udar mós reprezentante familia matebian na’in lima hateten, sira nain lima iha mota Noel-Ekat ne’e la’os sira mate saugati maibé, sira nia mate ne’e hakarak asegura rai Oe-Kusi Ambeno husi inimigu to’o lakon sira nia moris rasik.
“Ha’u kontente tebes depois tinan 19 nia laran bele mai direita hasoru komunindade Oe-Kusi Ambeno ne’ebé agradese tebes ba imi nia ben-vindo mai ami, ha’u hakarak agrdese ba embaixdor Koarea iha Timor-Leste ne’ebé lori akompaña ami to’o iha Oe-Kusi Ambeno”.
Tuir kronolojia trajedia Noel ekat akontese iha iha loron 6 fulan marsu 2003, hafoin simu informasaun husi postu seluk katak jerador avaria, forsa nain 5 ne’e deside atu ba hadia, bainhira hakur dadauk mota derepente kareta nia makina mate iha mota klaran. Major Byungjo Min no sarjentu Jonghoon Baek koko hadia kareta teki-teki mota tun. Hare ida ne’e, forsa nain tolu hanesan Major Jinkiu Park, Sarjentu Jeongjong Kim no Sarjentu Hee Choi koko atu salva sira nain 2 maibé korente mota boot liu tan hodi lori sira nain 3.
Ho espiritu kamaradazen no responsabilidade moral, Major Byungjo Min no Sarjentu Jonghoon Baek haree ai boot ida tun mai sira nain rua sa’e iha ai-leten hodi buka tuir forsa nain 3, maibé la konsege ikus mai sira nain 5 mate hotu, mota mak lori.
