AMBENO (TOP) — Xefe Estadu Maior, FALINTIL-Forsa Defeza Timor-Leste, (F-FDTL) Tenente Jenerál Falur Rate Laek, husu ba povu Oe-Kusi Ambeno atu labele tauk hato’o keixa ba komandu bainhira membru balun halo krime hasoru komunidade sira.
“Ha’u husu komunidade sira-ne’ebé besik iha postu ne’e, problema ruma mak imi, oan no alin sira, halo problema ka krime ruma ba imi, halo keixa, bele telefoni direita ba ha’u, sei ha’u hatene, hau sei haruka kedan ekipa ida mai toma medida ba sira, fó sansaun ba sira, ida-ne’e mak ha’u hakarak husu ba inan-aman sira iha Oe-Kusi. Tanba imi do’ok husi kapitál,” Falur Rate Laek, hato’o kestaun ne’e liu-husi diskursu iha seremonia inagurasaun edifisíu F-FDTL iha Sikone, aldeia Manuimpena, suku Lalisuk, Sub-Rejiaun Pante Makasar, Rejiaun Administrativa Espesial Oe-Kusi Ambeno, Sesta 26 Agustu 2022.
Nia afirma, povu maske beik no ki’ak maibé labele halo kanek sira-nia fuan, tan ne’e forsa agora sai hanesan forsa vokasionadu atu sai hanesan forsa populár povu nian, nune’e husu ba komandante no militár hotu tenki tau nia-án iha nia fatin, forsa ida-ne’ebé edukadau, forsa ida-ne’ebé sivilizadu, identifika o nia povu o nia inan-aman, ida ne’e mak ita hotu nia hakarak.
“Ha’u hakarak komandante ne’ebé atu mai iha Oe-Kusi Ambeno, komandante komponente fó instrusaun no diretiva estabelese norma ezekusaun permanente, kuda ai haleu edifisíu ne’e, hamatak no hamahon ita-nia fatin,” nia enkoraja.
Nune’e parte sujere, presiza promove komunikasaun ne’ebé mak efetivu hodi halo diskusaun ho parte floresta iha RAEOA atu kuda ai sira ne’ebé mak viavél no kontinua kuida nafatin ai sira ne’ebé mak kuda hodi hamatak, atu halo imajen di’ak ba postu F-FDTL iha iha Ambeno.
“Uluk ita uza natureza, ita-nia rai no ai-laran, anin, tasi no bee, sai hanesan ita-nia belun di’ak, ohin ita tenki fila nafatin fó valoriza ba sira, para hamahon ita, hamatak no haburas ita,” nia lembra.
