AMBENO (TOP) – Sekretaria Rejional ba assuntu Edukasaun, Solidade Sosial no Inkluizaun, Abelina da Costa hamutuk ho nia Prezidente Autoridade ba Rejiaun Administrativu Espesial ba Oe-Kusi Ambeno (RAEOA), Arsenio Paixão Bano susesu tan dala ida hodi konsege halo fuhuk ai-han hamutuk tonelada ida iha Ambeno.
Sekretaria Abelina hamutuk ho nia liman-ain sira rai foos tonelada ida ne’e to’o sai fuhuk tiha de’it iha nia armazen laran.
Ho kestaun ne’e, Xefe Suku Lalisuk, Hermenegildo Lalisuk konsidera autoridade Ambeno laiha planu no inkapasidade hodi jere armazenamentu ba ai-han sira ne’e.
“Durante ne’e povu barak mak hasoru problema hamlaha, maibé autoridade RAEOA lakohi fahe foos ne’e hodi sai fuhuk tiha de’it iha armazen laran. Agora foos ne’e fuhuk ona mak sira foin hakfodak hodi fahe ba komunidade sira,” Xefe Suku Hermenegildo Lalisuk hateten ba jornalista sira iha Padiae, Pante Makasar, Oe-Kusi Ambeno, Tersa 20 Setembru 2022.
Autoridade lokal ne’e lamenta tebes ho atitude autoridade sira iha Ambeno, tanba foos ne’e uja povu nia osan mak sosa, maibé ikus mai tenke sai fuhuk hotu tiha mak foin hakarak atu fahe ba komunidade sira.
“Ha’u la aseita ho autoridade fahe foos fuhuk ba komunidade sira, tanba orsida ema foto foos posting iha media sosial interpreta oin seluk ne’e prezidente mo’e ka la’e, ne’e mak horseik ha’u lakohi halo pedidu, sei ita halo pedidu xefi suku tau karimbu ne’e, aban bairu audit mai ne’e ita distribui ba komunidade la’os foos di’ak, maibé foos fuhuk fali,” nia esplika.
Ho situasaun ne’e, xefe suku Hermenegildo rekomenda ba autoridade RAEOA atu tenke hadia sira nia planu serbisu di’ak liutan iha tempu oin mai hodi evita hahan fuhuk iha armazen laran.
“Ha’u rekomenda de’it ba Prezidente Autoridade RAEOA, ba oin tenki hadia sistema ne’e, tanba Estadu ne’e ita hotu nian, presiza hare sasan ne’ebé sosa ona tenki fahe hotu ba komunidade, labele haree ba foos fuhuk ona mak foin hakarak fahe ba komunidade sira fó han fali animal.
Fahe foos fuhuk ba de’it militante FRETILIN
Komunidade Adelina Freitas husi aldeia Oe-Sono, suku Costa, Sub-Rejiaun Pante Makassar sente triste tebes, tanba prosesu distribuisaun foos fuhuk ne’e ba komunidade sira mós autoridade haree de’it mak sira nia maluk militante FRETILIN sira iha Oe-Kusi Ambeno.
“Ha’u sente triste tanba autoridade fahe foos fuhuk ba animal mós hili malu de’it. Durante loron hirak sira fahe foos ne’e ami lahatene ida, ami foin rona lia-anin dehan sosial fahe foos atu fó han animal, ne’e mak ohin loron mai lori kedas dokumentu kompletu, maibé ami mai to’o ne’e xefe departementu lojistika solidariedade sosial RAEOA, Januario Nesi dehan foos laiha, afinal foos iha armajen laran ne’e sei barak hela,” Adelina esplika.
Hahu duun malu ba kompetensia
Prosesu distribuisaun foos fuhuk ne’e alem de fahe de’it ba militante FRETILIN sira inklui sira ne’ebé serbisu iha Administrasaun Públiku nu’udar Funsionariu Públiku, maibé hamosu mós kestaun duun malu entre Xefe Departamentu Solidaridade Sosial, Adelino Cau, Xefe Departamentu Lojistika, Januario Nesi, no Sekretaria Rejional ba assuntu Edukasaun, Solidaridade Sosial no Inkluzaun, Abelina da Costa.
Adelino Cau dehan, maske nia nu’udar Xefe Departamentu Solidade Sosial, maibé kona-ba kestaun foos fuhuk ne’e Xefe Departamentu Lojistika, Januario Nesi mak responsabiliza durante ne’e, no Januario Nesi mós dehan falia nia hala’o de’it serbisu ne’e tuir orientasaun husi nia superior Abelina da Costa, no Abelina dehan fali nia lakohi fó komentariu klean kona-ba kestaun ne’e, tanba nia fó tiha ona fiar ba Januario Nesi hodi responsabiliza ba serbisu ne’e.
The Oe-Kusi Post (TOP) observa, Sekretariu Rejional ba assuntu Solidaridade Sosial no Inkluzaun liu husi nia Xefe Departamentu Lojistika, Januario Nesi hahu fahe ona foos fuhuk ne’e ba funsionariu públiku (FRETILIN) desde loron Kinta, 15 Setembru to’o Segunda 19 Setembru liuba. Kada funsionariu públiku hetan foos fuhuk saku lima (5), maibé iha loron Tersa, 20 Setembru bainhira TOP konfirma assuntu ne’e ba Xefe Departamentu Solidaridade Sosial RAEOA, Adelino Cau lakohi fó komentariu klean kona-ba assuntu ne’e ho rajaun Sekretaria Rejional ba assuntu Edukasaun, Solidaridade Sosial no Inkluzaun, Abelina da Costa fó tiha ona kompetensia ba xefe lojistik Januario Nesi mak responsabiliza prosesu distribuisaun foos fuhuk ne’e.
“Komesa Abelina sai Sekretaria, entaun nia foti Januario Nesi mak jere buat sira ne’e hotu, ne’ebé prosesu jestaun ba armazenamentu ne’e ha’u lahatene ona. Xefe Departamentu Lojistika, Januario Nesi durante ne’e nia mak jere foos, balun fahe ona ba ema balun hodi fó han sira nia animal,” esplika Adelino Cau.
Bainhira TOP halo esforsu konfirma assuntu ne’e ba Xefe Departamentu Lojistika, Januario Nesi, maibé lakohi fó esplikasaun klean.
“Ha’u lakohi fó komentariu tanba ha’u ne’e xefe departementu de’it, ha’u laiha kompetensia, ida ne’e ha’u nia superior Sekretaria mak iha kompetensia atu fó komentariu,” esplika Januario Nesi.
Ba Sekretaria Rejional ba assuntu Edukasaun, Solidaridade Sosial no Inkluzaun, Abelina da Costa mós lakohi fó komentariu, tanba kestaun ne’e la’os kabe ba nia kompetensia, maibé Xefe Departamentu Lojistika nia kompetensia.
Entretantu, Prezidente Autoridade RAEOA, Arsenio Paixão Bano rekoñese foos sira ne’e fuhuk duni ona, no foos sira ne’e autoridade sosa desde tinan kotuk hamutuk tonelada 1500, no rezulta tonelada ida mak sai fuhuk tiha ona.
“Foos ne’e ita rai kleur ne’e a’at tiha, entaun ita tenki fó ba komunidade inklui funsionariu sira ne’ebé mak presiza fó han sira nia animal hanesan fahi no manu,” esplika Bano.
