AMBENO (TOP) – Sekretáriu Jerál Partidu FRETILIN Mari Bin Amude sente hafodak tebes, tanba hafoin tun husi aviaun la'o itoan iha kapital Pante Makassar, hare bandeira mutin CNRT mak taka tomak (domina) iha rai enklave Oe-Kusi Ambeno.
“Ha'u hakarak husu ba povu Atoni imi brani ka la'e? Se imi brani ohin ha'u tun husi aviaun ZEESM no sa’e kareta tuir luron ne’ebé uluk ha'u halo ne’e haree bandeira CNRT nakonu iha dalan ninin,” hateten Alkatiri liu husi nia diskursu iha kampaña daruak kandidatu Prezidente Repúblika Francisco Guterres Lú Olo iha kampu futebol Oebau, Oe-Kusi Ambeno, Kuarta 13 Abril 2022.
Eis Prezidente Autoridade ba Rejiaun Administrativu Espesial Oe-Kusi Ambeno (RAEOA) ne'e hatutan, haree ba bandeira CNRT mak nakonu iha Ambeno, Alkatiri deskonfia fali kuadru CNRT sira mak halimar ona osan hodi sosa votu iha rai-ketan ne'e.
"Ha'u deskonfia fó sira osan mak komunidade hasa'e bandeira iha uma oin. Se sira selu imi ho osan mak hasa’e bandeira CNRT ne’e di'ak liu hatun bandeira ne'e fó fila ba nia nain, bele ka labele. Tanba aban ha'u fila Dili tuir dalan ne'e, ha'u lakohi hare tan bandeira CNRT tuir dalan ninin,” Alkatiri hakilar iha kampu leten.
Eis Primeiru-Ministru governu minoritáriu 2017 ne'e hato'o ba nia kamarada sira iha kampu futebol Oebau katak, bainhira ba Oe-Kusi Ambeno sente hanesan ba nia uma rasik. Tanba ne'e Alkatiri kontinua husu ba nia kamarada sira hamutuk rihun 11 resin ne'ebé hetan iha rezultadu eleisaun ronde dahuluk iha 19 Marsu liuba atu kontinua vota nafatin ba kandidatu Lú Olo iha eleisaun ronde daruak tenke manan.
“Bainhira povu Atoni fó fiar ba kandidatu Fransisco Guterres Lú Olo manan iha segundu ronde, ha'u promete sei fila-fali mai Oe-Kusi hamutuk ho kamarada Arsenio Paixão Bano para lori Oe-Kusi Ambeno ba oin, no bele hadia estrada husi Tono to’o Pasabe no husi ponte Noe-Fefan ba Citrana,” Alkatiri promete.
