AMBENO (TOP) – Ekipa kampaña ba kandidatura Prezidente Repúblika (PR) Francisco Guterres Lú Olo duni sai Komisaun Nasionál ba Eleisaun (CNE) iha fatin kampaña ho rajaun CNE ninia serbisu ne’e la neutru no hanesan mau hu’u.
Atividade dialogu ba kandidatura PR Lú Olo ne’ebé hala’o iha bairo Masin marka prezensa mós husi emprezariu FRETILIN Eric Lisuk ne’ebé durante ne’e hetan projetu barak husi Prezidente Autoridade ba Rejiaun Administrativu Espesial Oe-Kusi Ambeno (RAEOA) Arsenio Paixão Bano nia mandatu.
Kona-ba kestaun ne’e, Diretor CNE RAEOA Tomás Oqui Meta rekoñese situasaun ne’e akontese duni iha bairo Masin bainhira ekipa CNE sira ba atu halo supervizaun ba lala’ok dialogu kandidatu Lú Olo nian, infelizmente hetan inpedimentu husi militante FRETILIN sira.
“Horseik kandidatu númeru sorteiu 2 Fransisco Guteres Lú Olo hala’o mini kampaña iha bairo Masin, no deskonfia ekipa susesu orienta militante FRETILIN sira hodi duni tiha CNE, no sira dehan CNE nia serbisu la neutru no CNE ne’e mau hu’u,” diretor CNE Tomás Oqui Meta hateten ba jornalista sira iha nia serbisu fatin iha Sikluli, Oe-Kusi Ambeno, Kinta 7 Abril 2022.
Nia lamenta tebes ba situasaun ne’e, tanba CNE nia prezensa iha fatin kampaña sira ne’e atu asegura no halo supervizaun ba lala’ok kampaña eleitorál, tanba lei mak fó dalan.
Nia hatutan, situasaun ne’e la’os foin mak akontese, maibé akontese dala barak ona durante periodu kampaña iha ronde dahuluk nian ne’ebé komunidade sira rasik mak hato’o informasaun ba CNE katak ekipa susesu kandidatu Lú Olo nian durante ne’e hala’o door to door iha tempu kalan boot.
“No bainhira ami to’o iha baze, ami hetan sira hala’o door to door iha kalan boot, ida ne’e viola lei,” nia afirma.
