AMBENO (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA) Arsenio Paixão Bano hasai ona funsionáriu kontratadu ida iha área saúde nian, tanba kandidatu Prezidente Repúblika Francisco Guterres Lú Olo lakon iha sub-rejiaun Pasabe.
Tuir informasaun balun ne’ebé The Oe-Kusi Post (TOP) asesu, Sebastião Molo hetan kontratadu husi serbisu saúde Oe-Kusi Ambeno nian iha tempu hirak liuba, maibé Bano foti desijaun hodi hapara ona nia kontratu iha loron 30 Marsu 2022.
Tuir informasaun katak, Sebastião Molo mak sai nu’udar autor ba gravasaun video kona-ba Marcos Seo ne’ebé halo ameasa ba funsionariu kontratadu hotu iha área saúde nian tenke vota hotu ba kandidatu Lú Olo. Se la vota ba Lú Olo sei hapara kedas sira nia kontratu.
Loos duni, Arsenio Bano hamutuk ho Marcos Seo hapara duni ona funsionariu kontratadu balun, tanba de’it Lú Olo la manan maioria iha Oe-Kusi Ambeno iha eleisaun ronde dahuluk.
Bano durante ne’e hatudu malorek ninia ukun ho ditadura, maibé ukun ho ditadura ne’e sei la gaña povu nia konfiansa hodi vota ba kandidatu Lú Olo iha eleisaun ronde daruak nian iha loron 19 Abril 2022.