AMBENO (TOP) — Mota Tono tun mai Bara-Santo ho korente boot hamate Filomena Soares (matebian) ho idade 50, husi bairo Manuimpena, suku Lalisuk, Sub-Rejiaun Pante-Makasar, iha Rejiaun Administrativu Espesial Oe-Kusi Ambeno (RAEOA).
Mota rua butuk iha mota Tono provoka korente makaas tun ba diresaun Bara-Santo konsege lori inan Filomena Soares (matebian) mate derepente no husik hela nia kaben Gaspar Sabo no oan nain haat, mane rua no feto rua.
Tuir informasaun ne’ebé maka The Oe-Kusi Post (TOP) asesu iha familia sira konta, iha mate uma katak, molok udan bo’ot Filomena Soares ho nia kaben deskansa iha sira natar Oe-Nitas.
Iha dadersan tuku 9 otl, sira matebian Filomena Soares ho nia kaben Gaspar Sabo ba iha sira nia natar iha Oe-Nitas hodi fokit haree kiik atu kuda ba sira nia natar iha parte lorokraik sira fila mai sira nia rezidensia hasoru dezastre ne’e.
“Sira nain rua mai to’o mota Bara-Santo ho korente makaas, sira nain rua deside hakat tama ba mota ne’e to’o iha mota klaran derepente korente lori tiha nia kaben Filomena Soares sai fali iha Ponte Noefefan ho kondisaun mate,” Sasin Francisco Metan hateten ba The Oe-Kusi Post iha mate uma, bairu Manuimpena, suku Lalisuk, Sub-Rejiaun Pante Makasar, Rejiaun Administrativu Espesial Oe-Kusi Ambeno (RAEOA) iha Tersa lorokraik, 30 Marsu 2022.
Sasin Francisco Metan ne’e haktuir, Filomena ho nia laen ohin dadersan ba fokit hare hodi prepara atu kuda iha natar Oe-Nitas. Maibe iha tuku 4 ba tuku 5 lokraik matebian ho nia katuas oan fila husi natar atu mai sira nia uma.
“Sira na’in rua mai to’o mota tun maka’as sira hakur mota tama to’o klaran derepente korente maka’as rezulta Filomena Soares mota lori no katuas konsege hakat liu,” nia informa.
Iha par te seluk lideransa autoridade suku Lalisuk Hermenizildo Lalisuk hateten, nia parte sente triste tanba mota lori inan feton Filomena Soares no hosik hela nia oan nain haat feto rua mane rua.
“Ha’u sente triste tebes tanba mota lori inan feto ida no husik hela nia oan na’in haat feto rua no mane rua,maibe dezastre kuandu akontese ne’e ita la espera,” nia akresenta.
Nia hatutan, hanesan xefe suku agradese ba Polisia Nasionál Timor Leste (PNTL), Bombeirus iha RAEOA, no Joventude Manuimpena serbisu hamutuk to’o hetan Matebian Filomena Soares iha Ponte Noe-Fefan iha tuku hitu kalan.
