BAUKAU (TOP) — Sekretariu Jerál Partidu Frente Revolusionáriu Timor Lorosa’e Independente (FRETILIN) Mari Bin Amude Alkatiri hateten, viabiliza governu ne’e la presiza hare tuir konstituisaun Repúblika Demokratiku Timor Leste (RDTL).
“Viabiliza governu ne’e la presiza tau iha kontituisaun tenke halo kongresu nasionál fó kompetensia mai ha’u estuda ida ne’e, ha’u hakerek karta ba Tribunal Rekursu sira dehan este é normal la’os halo subar-subar, la’e,” Alkatiri hateten lia hirak ne’e liuhusi diskursu dialogu kampaña kandidatu Lú Olo iha salaun sentru konvensaun Baukau, Kota Baru, Postu Administrativu Baukau Vila, Munisipiu Baukau, Kinta 07 Abril 2022.
Alkatiri esplika, viabiliza oitavu governu ne’e Prezidente Repúblika klaru ona nia konkorda mak fó pose sira hotu hakarak to’o ema balun iha FRETILIN ida ne’e dehan tenke hari nono governu.
“Ita hamutuk ho Taur Matan Ruak aprezenta karta demisaun depois ita hotu mak tenke tau fali Taur Matan Ruak ba Primeiru Ministru, ha’u dehan ne’e laloos, ha’u lakohi nia atu monu tanba iha ema ida iha ne’e, nia gosta se mak atu sai liu-rai tenke liu husi nia depois nia la gosta ona nia sai atan fali ne’e mak ha’u la gosta,” Alkatiri soe lia ba Xanana.
Nia akresenta, viabiliza ne’e signifika fó vida nafatin ba governu ida ne’e, hanesan oxsijeniu menus ona tau oxsijeniu fó vida nafatin ida ne’e mak viabiliza la’os prátika politiku mai ho konstituisaun lai ha ida ne’e.
Partidu CNRT rasik durante ne’e konsidera desijaun Prezidente Repúblika Francisco Guterres Lú Olo nian ne’ebé permite FRETILIN sai ai-tonka (viabiliza) governu atual ne’e viola ona konstituisaun repúblika, tanba programa governu atual nian ne’e kompostu husi partidu tolu, CNRT, PLP no KHUNTO. FRETILIN laiha, maibé hafoin FRETILIN susesu sai ai-tonka bai ha governu atual, FRETILIN konsege okupa tiha ministériu lubuk ida inklui Estatal hodi troka hotu kedas administrador munisipiu sira iha rai-laran kuaje tau hotu kuadru FRETILIN, inklui troka tiha mós diplomata balun iha rai-liur.
