DILI (TOP) – Organizasaun sira ne’ebé durante ne’e hala’o serbisu ba promosaun direitu feto nian, no igualdade jéneru iha Timor-Leste hetan kritika maka’as husi lider karismátiku Kay Rala Xanana Gusmão inklui sidadaun sira iha mundu virtual (media sosial) relasiona ho kazu homesidu iha Rai-Kotu iha loron Domingu 30 Outubru liuba.
Hafoin kazu ne’e akontese, kuaje ema barak lansa kritika direita, no indireita ba lala’ok serbisu organizasaun hirak ne’e.
Ho kritika sira ne’e, organizasaun Rede Feto ho nia membru sira hamutuk 43 iha rai-laran katak, Rede Feto apresia ba komentáriu no interpretasaun balun husi maluk sira relasiona ho “justisa ba vitima DS” Rede Feto ho nia membru tomak no parseiru sira nakloke simu kritika konstrutivu sira no prontu kolabora hodi apoiu asisténsia ba vitima no luta ba justisa ba vitima violénsia bazeia ba jéneru.
“Rede Feto, nia membru no parseiru sira hakarak fó hanoin ba ita hotu katak Estadu maka autór no iha obrigasaun atu promove, proteje, no hakonu direitu sidadaun nian liga ba Konstituisaun RDTL artigu 105 kona-ba kompeténsia no kna’ar governu nian. No mós, hanesan sidadaun ema hotu iha dever atu hamriik no kontra forma violénsia saida de’it hasoru feto no labarik,” hateten Prezidente Konsellu Rede Feto Timor-Leste, Yasinta Lujina liu hosi Konferensia ba Imprensa iha salaun Rede Feto Kaikoli Dili foin lalais.
“Rede Feto hamutuk ho nia membru no parseiru sira hakarak hato’o katak ami hotu sei kontinua hala’o ami ida-idak nia papel hodi akompaña kazu ne’e garante direitu vitima iha prosesu tomak. Aleinde ne’e, hakarak bolu atensaun no husu ba públiku hodi labele julga organizasaun sosiedade sivil, maibé mai ita hamutuk hodi hapara forma violénsia oioin hasoru feto, labarik feto no grupu vulneravél iha Timor-Leste”.
Entretantu, antes ne’e lider karismátiku lansa kritika ida hasoru organizasaun hirak ne’e ho rajaun ladun halo serbisu maka’as hodi promove no proteze direitu feto, no labarik feto sira iha rai laran.
Notisia relevante: Lakon inan doben seidauk naton, Amoe tenke husik hela nia uma tan
Kona-ba kazu omesidu ne’ebé hamate Domingas Soares iha nia uma iha Rai-Kotu halo ema barak kondena maka’as aktu krime ne’e no husu ba autoridade judisiariu sira tenke fó kastigu todan ba arguidu ne’ebé komete iha kazu ne’e.
Tribunal Distrital Dili foti ona desijaun prijaun preventiva ba arguidu ba tama iha prijaun Bekora, Dili hodi hein prosesu julgamentu tuir mai.
