DILI (TOP) – Kooperativa Kreditu Mnatu Bitimo (KKMB) ne’ebé funda no harii husi Ambeno sira hamutuk nain 15 (feto 2, mane 13) iha tinan 2015 liuba, oras ne’e tama ona ba tinan 9 ho nia membru total tantu Dili no Oe-Kusi Ambeno hamutuk nain 274 ona ho total kapital US$700,000 resin.
Osan funan ne’ebé KKMB konsege hetan iha tinan fiskál 2023 – 2024 mak US$80,000 resin kompara ho osan funan iha tinan 2023 hetan de’it 70,000 resin. Desde ezistensia KKMB iha tinan 2015 to’o ohin loron, ninia osan funan sempre sa’e hela de’it, no nia membru foun sira aumenta ba bebeik to’o ohin loron. Total osan funan ne’e mai husi membru KKMB sira tantu iha Dili no Oe-Kusi Ambeno ne’ebé hala’o atividade rai no impresta iha fulan-fulan.
Durante tinan barak, Ambeno-oan sira iha Dili laran sempre buka dalan atu oinsa bele hametin liu-tan sira nia lasu amizade no unidade hodi bele kontribui ba prosesu dezenvolvimentu iha aspetu oioin tantu iha nivel nasionál no rejionál.
Antes ne’e mosu ona grupu no organizasaun oioin iha Dili laran ne’ebé harii husi Ambeno oan sira, ho intensaun atu bele involve no partisipa ativu liu-tan ba iha prosesu dezenvolvimentu ne’e, no mós atu sai nu’udar kontrolu sosial, maibé grupu hirak ne’e, ikus mai fahe malu namkari, tanba la iha sustentabilidade.
Hafoin mosu diskusaun naruk, ikus mai mosu tan tópiku ida mak, oinsa bele tau forsa hamutuk hodi bele hametin liu-tan ekonomia familiar. Nune’e, iha tinan 9 liuba ka iha tinan 2015 mosu ideia atu oinsa bele harii tiha kooperativa ida nu’udar xavi no ponte ida hodi halo Ambeno oan sira bele hasoru malu no halibur malu bebeik hodi rai no impresta osan, no mós aproveita tempu ne’e bele halo diskusaun kona-ba lala’ok dezenvolvimentu tantu iha Oe-Kusi Ambeno no teritóriu nasionál.
Ikus mai mosu duni konkordansia entre Ambeno oan sira balun hodi harii tiha kooperativa oan ida ho naran Kooperativa Kréditu Mnatu Bitimo (KKMB) ne’ebé harii husi Ambeno oan nain 15 (feto 2-mane 13) iha fulan Marsu tinan 2015 iha Dili.
Ohin loron, KKMB ninia ezistensia tama ona ba tinan 9 nia laran, hatudu duni nia konsistente iha progresu no rezultadu la’os de’it aumenta membru, maibé mós ninia kapital finanseiru no rekursu humanu mós kontinua aumenta.
Prezidente Fundasaun Murak Mean Timor (FMMT) Herkulanu de Sousa hateten, KKMB hamrik ho hanoin ida katak, koperativa nu’udar dalan ida ba ema Oe-Kusi oan sira atu dezenvolve sira nia moris, no mós kontribui ba dezenvolvimentu Rejiaun Administrativu Espesial Oe-Kusi Ambeno (RAEOA).
Atu garante ezistensia no legalidade, organizasaun ida ne’e mós rezista tiha ona iha Ministériu Justisa ho naran Fundasaun Murak-Mean Timor (FMMT), no públika tiha ona iha Jornal Repúblika iha loron 8 Abril 2022. Nune’e, KKMB automatikamente sei hamahan-an iha FMMT nia-okos. FMMT nia atividade ida mak rai no impresta osan liu husi KKMB.
Nu’udar koperativu ida, KKMB ninia atividade prinsipal ida mak rai-osan no fornese kréditu ba nia membru sira fulan-fulan.
Liu-husi atividade rai-osan no imprestimu, membru ida-idak iha oportunidade atu investe ninia osan fulan-fulan, no mós fasil atu hetan kreditu ho funan ki’ik (2%) kompara ho banku ka koperativu sira seluk. Alem de funan ki’ik, membru hotu-hotu mós simu fali excidentes (osan funan) kada tinan.
KKMB fahe tiha ona osan funan ba membru sira iha rai-ketan Ambeno iha loron 25 Maiu liuba, no Dili nian foin akontese iha loron Sábadu, 01 Juñu 2024.
Oinsa atu sai membru KKMB?
Atu sai membru, KKMB aplika kondisaun ekslusivu ida katak Oe-kusi-oan de’it (inklui feto-foun no mane-foun) mak bele tama. Tuir tan, membru hotu-hotu iha obrigasaun atu investe sira nia kapital (investimentu obrigatoriu & voluntariu) fulan-fulan, no mós devolve imprestimu tuir regulamentu ne’ebé iha. Membru ida-idak tama ho voluntariu, nune’e sira mós iha direitu atu sai husi KKMB iha kualker tempu.
Membru KKMB tantu husi Dili no Oe-Kusi Ambeno mai husi profisaun oioin hanesan karpinteiru, pedreiru, negosiante ambulante sira, taxista sira, membru F-FDTL, PNTL, funsionáriu públiku, emprezariu lokal no nasional.
Ho prezensa no ezistensia KKMB tantu iha Dili no Oe-Kusi Ambeno la’os de’it fornese imprestimu ba membru sira hodi hatan ba lia-mate no lia-moris, maibé mós konsege motiva dadauk ona membru sira atu oinsa bele hahu ona sira nia atividade negósiu iha sira nia moris lorloron.
KKMB mós iha ona nia eskritoriu permanente ida iha Manleu, Dili, no ida seluk iha Palaban, Oe-Kusi Ambeno.
