DILI (TOP) — Reitór Dili Institute of Technology (DIT) Alvaro Manezes Amaral husu governu fasilita pulsa ba estudante sira hodi aprende iha uma liuhusi online durante periodu serka sanitária.
“Dadaun ne’e, ensinu superior tomak tantu eskola públiku no privadu sira, hotu-hotu eskola iha uma de’it sirkular ne’ebé mai husi ministru katak suspende aprendizajen ne’ebé iha kampus, universidade hotu-hotu buka mekanismu plata fórma aprende liu-husi online ne’ebé iha hodi nune’e bele aprende husi ita nia joven sira maske agora dadaun sira hela iha uma,” katak reitor Alvaro ba jornalista sira iha DIT, Domingu 21 Domingu 2021.
Reitór DIT ne’e hatutan, ohin simu intervensaun primeiru ba joven estudante sira katak loos duni estudante labele lakon oportunidade atu aprende, maibé estudante lakon esperansa maske situasaun pandemia Covid-19 ne’e difisil.
“Ha’u haraik aan estudante hotu-hotu DIT no estudante universidade sira seluk hakarak hato’o proposta se bele karik tau iha ajenda Vise Primeira Minsitra Armanda Berta do Santos katak agora dadauk estudante tomak halerik kona-ba Pulsa. Tanba ha’u pesoalmente ko’alia ho Ministru Ensinu Superior ami nia proposta maka ne’e sei bele estadu tanggun 0.50 centavos, inan-aman sira tanggung 0.50 centavos hodi kontinua aprendizajen,” reitor ne’e husu.
“Ami nia proposta maka ne’e espera katak oitavu governu konstitusional sei la so’e hela prosesu aprendizajen hodi fasilita atu nune’e ita nia estudante sira hetan kompetensia no kapasidade ne’ebé naton bele asesu iha merkadu traballu”.
Hatan ba pedidu ne’e, Ministru Edukasaun Ensinu Suprerio Siensia no Kultura, Longuinhos dos santos katak nia konsidera pedidu ne’e.
“Ohin ha’u hatete katak ita sei tau atensaun, maibé ita mós ba orsamentu ne’ebé maka ita preve portantu Ministériu Suprerior. Ha’u hatete ona ba ita boot sira katak orsamentu ita seidauk preve ba ajudu pulsa ba estudante sira, maibé ita tetu no tau konsiderasaun ba asuntu ida ne’e,” nia esplika.
