DILI (TOP) – Hafoin remata nia estudu lisensiatura iha área Sosiolojia husi University of Hawaii at Hilo (UHH), Estadus Unidus Amerika iha Maiu 2012, Ambeno-oan ne’e hetan tan oportunidade bolsu estudu ida husi governu Australia ho naran Australian Award Scholarship (AAS) iha tinan 2019.
Molok ba hasai nia estudu mestradu iha Victoria University iha Melbourne, Australia, nia hetan uluk ona bolsu estudu ida husi Estadus Unidus Amerika (EUA) ho naran United States Timor-Leste Scholarship Program iha tinan 2009 no remata nia lisensiatura iha área Sosiolojia husi University of Hawaii at Hilo (UHH) iha Maiu 2012.
Erkulanu de Sousa hasai nia lisensiatura iha área Sosiolojia husi University of Hawaii at Hilo (UHH), Estadus Unidus Amerika iha Maiu 2012./Net.
Fila husi Hawaii, nia hetan serbisu ida iha Embaixada Australia iha Timor-Leste nu’udar Koordenador Senior ba Dezenvolvimentu Rural ne’ebé hahu husi loron 11 Fevereiru 2013 to’o 24 Marsu 2017.
Remata husi kargu ne’e, Erkulanu ba serbisu fali iha programa Parseria ba Dezenvolvimentu Umanu entre Australia ho Timor-Leste ne’ebé lansa tiha ona iha loron 10 Marsu 2017 iha Timor-Plaza, Dili. Parseria ba Dezenvolvimentu Umanu (Partnership for Human Development) ne’e maka programa integradu ida ne’ebé governu Austrália no governu Timor-Leste hala’o hamutuk, durante tinan 10, husi tinan 2016 to’o iha tinan 2026.
Erkulanu hamrik iha Casa Branca (White House)./Net.
Bainhira governu Australia anunsia bolsu estudu ho naran Australian Award Scholarship (AAS) iha Timor-oan lubuk ida maka kompete iha oportunidade bolsu estudu ne’ebé iha reputasaun a’as no kompetitivu tebes. Husi ema lubuk ne’ebé kompete, Erkulanu de Sousa husi aldeia Nianapu, suku Bobometo, sub-rejiaun Oe-Silo, Oe-Kusi Ambeno ne’e ikus mai hetan rezultadu di’ak. Nia selesionadu manan tan bolsu AAS ne’e hodi ba kontinua nia estudu mestradu iha área Dezenvolvimentu Komunitária Internasionál iha Universidade Victoria iha Melbourne, Austrália, iha tinan 2019, no gradua tiha ona iha fulan Juñu liuba.
Erkulanu de Sousa remata ona nia estudu mestradu iha área Dezenvolvimentu Komunitária Internasionál husi Universidade Victoria iha Melbourne, Austrália, iha fulan Juñu liuba./Net.
Erkulanu sempre laran monu kona-ba dezenvolvimentu komunitária. Antes komesa nia mestradu, nia harii kooperativa kréditu iha Dili hamutuk ho nia kolega sira nune’e membru sira bele asesu ba fundu ne’e. Nia mós hamutuk ho konsellu Youth in Action Towards Sustainability, ONG lokál ida iha Rejiaun Administrativu Espesial Oe-Kusi Ambeno (RAEOA).
Bainhira inundasaun akontese iha Timor-Leste iha fulan Abril, Erkulanu ho lalais muda nia atensaun hodi tulun família sira ne’ebé mak lakon sira nia uma. Nia hala’o kampaña ba fundus liuhusi nia pájina Facebook, ne’ebé mak hetan fundus ba família afetadu sira hamutuk 150 iha Dili no Oe-Kusi Ambeno.
“Bainhira ha’u gradua no fila mai Timor-Leste fulan oin, ha’u planeia hodi investe ha’u nia tempu no matenek hodi haforsa ami nia kooperativa kréditu. Sai membru la’os deit tulun ema hodi hetan grau seguransa finanseira hodi hadi’ak sira nia moris, maibé mós tulun sira hodi bele hasoru situasaun emerjénsia,” katak Erkulanu de Sousa ne’ebé The Oe-Kusi Post (TOP) asesu iha pájina Facebook Australia in Timor-Leste, Kinta 01 Jullu 2021.
Erkulanu de Sousa ho bandeira RDTL iha áreador Universidade Vitoria iha Melbourne, Australia, Juñu 2021./Net.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
