Regra Prevensaun Virus Corona Husi Igreja Timor

Oekusipost.com Dili – Konferênsia Episkopál Timorense (CET), deside ona regra própriu hodi konvida sarani sira, atu halo tuir nu’udar meiu ida ba prevensaun virus corona.

Regra prevensaun ne'e CET fó sai liuhusi Komunikadu Pastorál, ne'ebé le’e ofisialmente husi sekretáriu ezekutivu CET, Padre Leandro Maria Alves, iha loron 14 fulan Marsu tinan 2020, rua 12 Novembru Balide Dili Timor Leste.

Iha Komunikadu hatete, moras Corona pasa liuhusi kontaktu isín nian, biar iha Timor-Leste seidauk hetan kazu konfirmadu, maibé husu ba povu tomak, atu kalma nafatin no di’ak liu halo prevensaun.

"Tinan ida ne'e Igreja Timor hamutuk ho Amo Papa, ne'ebé halo mós nia prevensaun ba moras ne'e, konvida ita atu halo tuir rekomendasaun Organizasaun Mundial Saúde no mós pessoál saúde ita nian, atu: fase liman beibeik, kuidadu fatin moos, fani no mear tenke taka ibun, evita atu kontaktu ho ema seluk, evita atu labele kontaktu ho animal fuik, membru familia sira ne'ebé foin fila husi rai liur mai, evita atu halo kedas kontaktu fízika hanesan kaer liman, rei malu, hakuak malu", haktuir husi Komunikadu Pastorál ne'e.

Razaun Bispu sira fó sai regra ne'e, tanba Uma Kreda iha selebrasaun sira halibur ema barak no Kreda sai fatin ne'ebé ema barak ba.

"Maski moras ida ne'e seidauk hada'et, Kreda Timor akonsella prevensaun balun durante selebrasaun sira Uma Kreda Nian mak hanesan, liman labele kona aguaventa fatin ne'ebé tau iha uma Kreda nia oda matan, evita rei estatua sira ne'ebé mak iha Uma Kreda laran, lalika ka’er liman bainhira fó pás ba malu, simu de’it komuñaun iha liman. Evita hola bensaun ka rei liman, Igreja fó Konsellu ba sira ne'ebé mak moras, isín fraku, atu lalika mai misa no reza de'it iha Uma", haktuir tan husi Komunikadu ne'e.

Moras Corona nu'udár moras foun ida ne'ebé perigu ba vida ne'ebé daet ba mundu tomak (epidemia mundiál), no nasaun lubuk ida mak halo prevensaun, ba moras ida ne’e.

Biar mundu tomak no povu Timor mós liu hela husi prova ida ne'e, maibé, Nai Maromak sei la taka matan ba timoroan sira nia harohan.

"Ne’e duni husu ita atu reza, hanesan salmista dehan, "Rahun di’ak ba sira ne'ebé tau fiar iha Maromak", (Salmo, 40,4).

Komunikadu ne'e fó sai iha loron 13 fulan marsu tinan ne'e, asina husi Prezidente CET no Bispu Maliana Dom Norberto do Amaral, Arsebispu Dili no Pro Prezidente CET Dom Virgilio do Carmo da Silva, SDB, Sekretariu Jerál CET no Bispu Baucau Dom Basilio do Nascimento. (*)

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE