Oekusipost.com Dili – Rezultadu teste laboratoriu hatudu ema estranjeiru ida oras ne’e positivu kona ona virus corona iha Timor-Leste.
Ministra Saúde Interina, Elia Amaral hatete, rejultadu teste ba Covid-19 pozitivu nain 1 iha Timor-Leste. Komunikadu imprensa hato'o hosi Vise-Ministra Kuidadu Saude Primaria tuir despaixu 012/PM/III/2020 Ministeriu Saude mak lidera komisaun prevensaun kontrolu Covid-19 iha Timor-Leste.
Maske virus corona eziste ona iha Timor-Leste, maibé governante ne’e kontinua husu ba sidadaun hotu iha rai laran hodi labele tama iha pániku, maibé tenke kontrola a’an nafatin, katak ida-idak tenke kontrola nia hijiene pessoal liu husi fase liman ho sabaun sanitizer kada horas, labele ka’er liman, labele rei malu, no tein hahan liliu tein na’an karik tenke tasak didi’ak molok han.
“Rejista ona ema ida positivu, no ema ne’e foin mai fila husi rai liur. Agora tama ona iha fatin izolamentu,” hatete Ministra Saúde Interina, Elia Amaral liu husi konferensia imprensa Sábadu 21 Marsu 2020.
Antes ne’e iha loron Sesta, 20 Marsu 2020, Diretóra Prestasaun Saúde, Ministériu Saúde, Odete Viegas da Silva hatete Ospitál Referál Baukau tenke evakua ona Juíz Timoroan ida hosi Baukau mai Dili tanba deskonfia hetan infesaun ba virus corona.
“Funsionariu Timor oan ne’e hamutuk na’in neen ne’ebé antes ne’e bá tuir formasaun Juís nian iha Portugal”, hatete Odete.
Maibé, ida ne’ebé oras ne’e positivu infetadu ba virus corona la’ós refere ba pasiente ne’ebé evakua husi Baukau iha loron Sesta liuba.
Prezidente Repúblika, Francisco Guterres Lu Olo mós foti ona desijaun hodi bandu sidadaun sira husi rai liur atu labele tama mai Timor-Leste.
