Oekusipost.com Dili – Deklarasaun bankada CNRT ne’ebé hala’o iha Parlamentu Nasionál (PN) iha loron 5 Maio 2020 konsidera “ilegal”, tanba la hetan autorizasaun husi Komisaun Politika Nasionál (KPN).
Segundu Vise Prezidente Partidu CNRT, Virgilio Simith konsidera konferensia imprensa ne’ebé deputadu CNRT sira halo iha loron 5 Maio 2020 iha PN laiha orientasaun no desijaun husi partidu.
“KPN konsidera deklarasaun husi deputadu CNRT sira hanesan aktu individual, la reprezenta partidu nia pozisaun,” hatete Virgilio liu husi konferensia ba imprensa iha sede partidu CNRT iha bairo Grillos-Dili, Kuarta 6 Maio 2020.
Nunee, nia afirma, desijaun KPN ne’ebé hala’o iha loron 30 Abril 2020 atu fó apoiu tomak no autoriza Prezidente partidu CNRT atu reprezenta KPN no partidu hodi hola medida no desijan kona-bá situasaun politika atual.
“Reafirma KPN nia pozisaun no apoiu tomak ba petisaun ne’ebé hatama ona ba Supremu Tribunal Justisa/Tribunal Rekursu iha loron 5 Maio 2020,” afirma Virgilio.
Ho kestaun ne’e, Virgilio dehan, partidu ka KPN sira sei foti asaun ruma hasoru deputadu CNRT sira ne’ebé halo deklarasaun ba imprensa iha loron 5 Maio liuba.
Nia esplika tipu asaun ne’e, sei desidi liu husi desijaun membru KPN sira iha tempu badak, maibé estrutura KPN nafatin deposita konfiansa tomak ba Prezidente Partidu CNRT, Kay Rala Xanana Gusmão kona-bá petisaun ne’ebé hatama tiha ona.
Entretantu, antes ne’e deputadu sira husi partidu CNRT halo deklarasaun ba imprensa iha sala bankada CNRT hodi husu ba Prezidente Repúblika, Francisco Guterres Lú Olo atu bolu partidu FRETILIN no CNRT hodi halo dialogu, maibé estrutura KPN tomak desmente tebes ba deklarasaun ne’e, tanba lahetan autorizasaun husi partidu.
“Ami desmente tebes ba asaun ne’e,” hateten Virgilio.
Nia hatutan, KPN mak iha poder boot liu iha partidu laran, no deputadu sira ne’ebé halo serbisu iha PN sempre hetan autorizasaun no orientasaun husi estrutura KPN mak sira foin bele halo intervensaun ruma iha bankada laran ka iha plenaria.
