Oekusipost.com Dili – Situasaun governu atual hanesan bero ki’ik ida iha tasi-klaran ne’ebé hasoru hela laloran boot baku ba-mai, maibé sei esforsu a’an nafatin hodi hakat sai mai rai-maran.
Primeiru-Ministru Taur Matan Ruak ne’ebé antes ne’e rekoñese nia governu atual la’o ho roda tolu de’it, no ikus mai partidu CNRT baku mate tiha iha fulan Janeiru liuba sei iha esforsu nafatin hodi lidera governu atual ne’ebé hasoru hela laloran tasi boot be siak liu tasi mane nian iha Kosta Sul.
Nia garante katak, Prezidente Repúblika (PR), Francisco Guterres Lú Olo sei posse ba membru governu foun nain 6 ne’ebé aprezenta ona iha loron hirak liuba.
"Lista kandidatu ba membru Guvernu ami aprezenta tiha ona agora hein de’it Prezidente Repúblika deside no marka loron ita boot sira sei haree prosesu la'o," hateten Primeiru-Ministru, Taur Matan Ruak (TMR) ba jornalista sira iha Palásiu Prezidensial iha Ai-Tarak Laran, Dili Kinta 7 Maiu 2020.
Primeiru-Ministru ne’ebé antes ne’e hato’o nia pedidu demisaun no ikus mai retira fali nia pedidu demisaun ne’e hatutan, membru governu foun sira ne’e balun mai husi partidu FRETILIN ne’ebé nia Prezidente mak atual Prezidente Repúblika, Francisco Guterres Lú Olo, no balun mai husi Partidu Demokrátiku (PD).
Lista membru governu foun ne’ebé haruka husi governu mak hanesan na'in ida husi PD, restu mai husi partidu FRETILIN mak hanesan, Ministru ba Antigu Kombatente sira, Meta Malik, Ministra Saúde (MS) Odete Maria Freitas, Vise-Ministra Turizmu Komersiu Industria (VMTKI) Inácia Texeira, Ministru Administrasaun Estatál (MAE) Faustino Cardoso, Ministru Turizmu Komersiu Industria (MTKI) Manuel Vong, no Ministru Finansas (MF) mak Fernando Hanjam.
Entretantu, antes ne’e jurista barak komenta, hafoin Orsamentu Jeral Estadu tinan 2020 la passa no liu loron 60, tuir loloos Prezidente Repúblika tenke disolve ona Parlamentu Nasionál hodi forma governu foun ka desidi eleisaun antisipada, maibé to’o ohin loron seidauk iha desijaun ruma husi prezidente rasik.
Tanba ne’e, iha loron 5 Maiu foin lalais deputadu hamutuk nain 19, nain 18 husi partidu CNRT no nain ida husi partidu UDT/FM hato’o ona petisaun ba Supremu Tribunal Justisa (STJ) atual Tribunal Rekursu (TR) hodi halo fiskalizasaun ba aktu desijaun prezidente nian durante ne’e kumpre duni Konstituisaun RDTL ka la’e. Tribunal Rekursu tuir advogadu Manuel Tilman katak sei presija loron 30 mak foin fó apresiasaun ka desijaun ba petisaun ne’ebé hatama tiha ona.
