LOSPALOS (TOP) — Reprezentante kuadru superior partidu CNRT atual eis Prezidente Timor GAP, Francisco Monteiro katak, durante ne’e kamarada FRETILIN sira sempre deklara, munisipiu tolu hanesan Lautem, Baukau no Vikeke ne’e nu’udar knu’uk boot ba FRETILIN, maibé faktu hatudu, rezultadu eleisaun prezidensial iha ronde dahuluk no daruak, manu-knu’uk ka manu-tolun ne’e hahu nakfera rahun ona iha Ponte-Leste ho rezultadu votu validu hamutuk rihun 18 ba Prezidente Repúblika, José Ramos-Horta iha tinan kotuk.
Kakavei-oan ne’e hatutan, atu halo manu-tolun ne’e kontinua nakfera rahun tan iha eleisaun parlamentar, nia husu no sujere ba kordenador munisipiu partidu CNRT iha Lautem to’o estrutura baze tenke kontinua serbisu maka’as atu bele hetan votu 18000 iha Ponta-Leste, hodi garante vitória ba CNRT iha eleisaun parlamentar tinan ida ne’e.
Nia garante, votu partidu CNRT nian Ponta-Leste sei aumenta tan iha eleisaun parlamentar, tanba referénsia iha eleisaun prezidensial tinan kotuk, José Ramos-Horta hetan votu validu hamutuk 17000 resin, no garante katak votu ida ne’e sei aumenta.
“Munisípiu Lautem halo tiha ona história foun ida, foin lalais ne’e, iha eleisaun prezidensiál ba ronde dahuluk ita halo nakfera manu-tolun, uluk ita nia maluk sira husi FRETILIN gosta dehan katak, munisípiu tolu ne’e, ema ida labele tama, maibé neneik tama iha Lospalos ona, tanba ne’e ita tenke serbisu didi’ak, se bele to’o rihun 18 ne’e serbisu ita hotu nian,” Francisco Monteiro hato’o ba estrutura partidu CNRT nian bainhira hala’o konsolidasaun iha eis merkadu Lospalos, Sábadu 18 Marsu 2023.
Konsolidasaun partidu CNRT ne’ebé hala’o iha loron 18 Marsu liuba iha eis merkadu Lospalos ne’e partisipa husi Vise Prezidente Partidu CNRT, Virgílio Simith, Iku Lay, no akompaña husi Adjuntu Sekretariu Jeral, Francisco Guterres hamutuk ho estrutura nasionál no estrutura munisípiu Lautem realiza.
Iha konsolidasaun ne’e, estrutura CNRT nivel nasionál to’o baze simu afiliadu sira husi partidu FRETILIN, PLP no PD hamutuk 500 resin ne’ebé mai ho fuan-laran no kabun-tomak atu fó sira nia votu konfiansa ba partidu CNRT hodi bele lori hikas Comandante em Chefe das FALINTIL, Kay Rala Xanana Gusmão ba assume kargu nu’udar Primeiru-Ministru iha governasaun foun tuir mai.
“Ha’u mai ho objetivu rua, ida hakarak, lori Avo Nana sai Primeiru Ministru dala ida tan, tan só úniku Avo Nana mak bele lori esperansa, lori dezenvolvimentu ba povu, no rai ida ne’e,” deklara afiliadu ida husi partidu FRETILIN.
“Razaun segundu, mak kontinua ko’alia kona-ba fronteira, ita hakarak ukun an, tenke iha soberania total, tanba ne’e úniku CNRT mak iha vizaun no komprimissu hodi hadi’a rai ida ne’e,” afiliadu FRETILIN afirma.
Iha fatin hanesan afiliadu ida husi PLP aprezenta nia razaun prinsipal katak, nia rasik ho nia belun lubuk ida desidi afilia ba partidu CNRT, tanba kontra total deklarasaun Sekretariu Jeral Partidu FRETILIN, Mari Bim Amude Alkatiri ne’ebé antes ne’e deklara ba públiku hodi hasai Xanana nia manias (mitu) ka atu halo dismitfikasaun ba Xanana.
“Ha’u ho kolega sira mai iha ne’e ho objetivu ami lakohi, desmistifika Kaka Lafai ‘Maun Boot’ Kay Rala Xanana Gusmão, hakarak konkretiza kriasaun kampu serbisu ba joven sira liu husi dada kadoras mai Timor-Leste, ami hakarak mós, Kaka Lafai ukun hodi halo’os buat hotu, molok entrega ba jerasaun foun,” deklara afiliadu PLP.
Sekretáriu Jerál Movimentu Apoiu Maun Comandante em Xefe, Kay Rala Xanana Gusmão – MORAXK-XG, Norman Marques husu ba afiliante sira husi FRETILIN, PLP no PD atu reforsa koordenasaun iha baze, ho mapeamentu polítiku definidu, hodi garante vitória ba CNRT.
“Se bele, durante tempu badak nia laran, liu husi konsolidasaun ne’ebé sei realiza iha Postu Administrativu Iliomar, produz mapeamentu ida, atu aprezenta ba parte Iliomar no Luro, hodi fó vitória ba CNRT, tanba Ponta Leste sai pontu konsentrasaun Maun Boot nian, hodi konkretiza Planu Estratéjiku Dezenvolvimentu Nasionál,” Norman sujere.
Eis membru kuadru frente diplomátika no eis konsultadu Timor-Leste ba Sydney-Australia, Luciano Valentim da Conceição alias Timor Maubere konsidera, koligasaun PLP, FRETILIN no KHUNTO agora la merese ona atu kontinua lidera rai ida ne’e, tanba partidu tolu ne’e sira nia governasaun durante tinan hirak ba kotuk hetan de’it mak valor-mean iha sira nia kaderneta.
“Atu salva nasaun ida ne’e, atu dignifika povu Maubere nia mehi uluk, agora no ba futuru labele fó fiar ba FRETILIN, KHUNTO no PLP hodi ukun iha periodu tuir mai,” deklara Luciano “Timor-Maubere”.
Vise Prezidente Partidu CNRT, Virgílio Simith simu afiliante sira husi partidu tolu ho ksolok, no dehan CNRT nia odamatan boot nakloke ba militante husi partisu sira seluk mai hamutuk hodi lori CNRT ba hetan vitoria iha eleisaun parlamentar ne’e.
“Tanba tuir prinsípiu partidu CNRT nian, ukun ne’e povu nian, demokrasia hanorin katak, ukun iha demokrasia nia kompriensaun katak, fó nia fiar ba ema ida ne’ebé mak bele, para ka’er ukun ida ne’e, hodi hare ba povu nia moris, bem estar iha tempu oin mai. CNRT ka’er povu nia ukun, Maun Boot ka’er povu nia ukun, povu fiar ba nia, entrega ba nia. Ita bele fiar katak, periodu ida husi 2023 ba 2028, ita-nia Maun boot sei la entrega ukun ba se de’it, sei ka’er to’o hotu, para hare fila-fali dezenvolvimentu ne’ebé stagnadu durante tinan hirak ikus ne’e,” esplika Virgílio Simith.
