DILI (TOP) — Jurista no Padre Julio Crispin husu ba Konselleiru Masimu Partidu Kmanek Haburas Unidade Nasionál Timor Oan (KHUNTO), José dos Santos Bucar atu labele obriga ema hotu tenke ba halo juramentu iha foho Ramelau, tanba kuandu obriga ona ema ne’e categoria la normal ona.
Padre ne’e hatutan, normal hela kuandu José Bucar lori maka nia kuadru politiku sira ba halo juramentu iha Ramelau, maibé ida la normal no viola lei kuandu obriga ema baibain ba hotu juramentu.
“Nia ba halo atividade partidu inklui halo juramentu ne’e nesesidade no planu nian, kuandu ko’alia kona-ba juramentu normalmente ba kuadru politiku sira bainhira presiza, maibé ba simpatizante sira ne’e la presiza (labele obriga),” katak Padre Julio Crispin ba The Oe-Kusi Post (TOP) iha nia rezidénsia Pantai Kelapa, Dili, Kuarta 11 Agustu 2021.
Nia dehan, kuandu programa ne’e espesiál ba sira ne’ebé maka iha kargu ne’e bele, tanba sira maka tuur iha estrutura partidu, entaun iha duni dever ba juramentu kuandu órden tuun tenki ba.
“Ba membru governu sira ne’e normal tanba tuur iha estrutura partidu ninian, ne’ebé sira ba juramnentu tanba ida ne’e parte ida hosi kumprimisu. Ba halo iha Matebian ka iha ne’ebé de’it tanba kumprimisu atu bele kesi ema (kuadru polítiko) sira ne’e ho partidu,” nia argumenta.
Nia esplika, halo violasaun ba prinsípiu ruma kuandu obriga ema ne’ebé la tuur iha estrutura ba hotu halo juramentu, tanba ida ne’e halo violasaun grave ba liberdade ema ida-idak nia atu rekolla ka hili tuir lei haruka.
“Simpatizante labele juramentu, tanba ne’e ita kesi ema nia liberdade atu vota (hili tuir hakarak ne’e la iha ona), ne’ebé simplis simpatizante la presiza juramentu, tanba ne’e ita obriga ema piñor nia liberdade ba partidu ida (obriga hodi bandu ema ne’e labele vota ba partidu seluk),” reforsa hodi fó hanoin.
Nia afirma, partidu labele hanorin ninia simpatizante atu mate bandeira hun, maibé obrigadu nafatin fó liberdade ba nia ema hodi rekolla ka hili tuir nia konxíensia ba ninia kandidatu ka partidu favoritu.
Antes ne’e José dos Santos Bucar katak, tuir loloos sira ba halo juramentu iha foho Ramelau ne’e kleur tiha ona, maibé seidauk halo hela de’it, tanba kauza husi krize politika, no moras Covid-19 iha rai-laran.
Nia argumenta, membru governu hamutuk 14 inklui reprezentante povo (deputadu KHUNTO) nian na’in 5 daudaun ne’e iha kondisaun fíziku liliu imunidade estavel ona hafoin simu vasina, tanba ne’e iha loron ne’ebé determinadu sei lori hotu ba hala’o seremoniá ritúal ne’ebé maka sempre ko’alia iha tempu kampaña eleitoral.
Parte balun konsidera juramentu Ramelau ne’e nu’udar estratéjia politika ida ba KHUNTO hodi buka votus tantu iha eleisaun prezidensial no parlamentar, maibé Konseleiru mazimu partidu KHUNTO rejeita total hodi dehan juramentu ne’e nu’udar promesa ne’ebé deklara tiha ona.
“La’e, lahanesan ne’e, tuir loos juramentu ne’e iha tinan kotuk atu ba, preparasaun atu ba mosu fali Covid-19, ida ne’e maka halo atraza to’o agora no impase polítika (kríze polítika) ne’ebé ita hotu hasoru, tanba iha momentu atu ba, maibé membru governu hosi KHUNTO balun seidauk simu tomada de posse tanba ida ne’e mak ita (ami) dada to’o agora,” José Bucar rejeita.
Maske nune'e, nia promete dala ida tan katak, sei lori duni nia membru governu ho deputadu sira husi partidu KHUNTO hodi ba halo juramentu iha foho Ramelau iha loron 14 Agostu 2021.
Nia promete dala rua ona, iha kampaña eleisaun antesipada fó-sai ba públiku katak bainhira ka'er ukun sei lori membru governu hosi KHUNTO ba halo juramentu ba foho Ramelau.
Kuadru partidu KHUNTO ne’ebé maka sai membru governu kompostu Vise-Primeira Ministra no Ministra Solidariedade Sosiál no Inkluzaun (MSSI) hosi Armanda Berta dos Santos, Ministru Transportes no Komunikasaun (MTK) José Agustinho da Silva, Ministru Agrikultura no Peska (MAP) Pedro dos Reis, Vise-Ministru Negósiu Estranjeiru no Kooperasaun (MNEK) Julião da Silva, Vise-Ministru Edukasaun, Juventude no Desportu (MEJD) António Guterres, Vise-Ministru Obras Públikas (MOP) Nicolau Lino Freitas Belo, Vise-Ministru Agrikultura no Peska (MAP), Abílio Xavier de Araújo, Vise-Ministru Interiór (MI) António Armindo, Sekretáriu Estadu Formasaun Profisionál no Empregu Alarico do Rosário, Sekretáriu Estadu Terra no Propriedade Mário Ximenes, Sekretáriu Estadu Peska Elídio de Araújo, Sekretáriu Estadu Protesaun Sivíl, Joaquim José Gusmão dos Reis Martins.
