DILI (TOP) – Jurídico Social, Lda (JU,S) durante ne’e konsege hetan osan kuaje $17.000 bainhira reprezenta vitima sira ba kazu alegasaun sexual ne’ebé deskonfia akontese iha uma mahon Topu-Honis, Oe-Kusi Ambeno.
Tuir informasaun ne’ebé The Oe-Kusi Post (TOP) asesu iha pájina ofisial Facebook JU,S nian katak, JU,S nia apoiu ba kazu krime abuzu seksuál hasoru labarik ne’ebé arguidu hanesan eis-padre Amerikanu ho inisiál RD, bazeia ba prokurasaun hosi vitima rasik no inan-aman sira ho totál ema na’in 17.
Kona ba kazu ne’e, JU,S nia serbisu tuir orientasaun hosi Lei kontra Violénsia Doméstika, no bazeia ba previzaun legál ba direitu vítima/lezadu tuir Kódigu Prosesu Penál. JU,S iha kompromisu maka’as ba kliente sira nia direitu no segredu justisa, nunka no sei la hato’o ba públiku informasaun ne’ebé bele vióla kliente nia direitu ka segredu justisa.
“Tanba ne’e mak, JU,S durante tinan rua ho balu ona, la halo deklarasaun barak públiku”.
JU,S deklara katak, oras ne’e JU,S reprezenta labarik no joven feto 17 ne’ebé sai vítima ba abuzu seksuál hosi RD. Vítima sira iha tinan entre 12 to’o 26. JU,S hahú reprezenta vítima ida ba kazu ida-ne’e iha fulan Outubru 2018. Iha 2019 no 2020 númeru vítima/família vítima ne’ebé husu JU,S nia apoiu aumenta ba beibeik to’o agora iha vítima na’in 17. Depois rona tia deklarasaun públiku hosi Prokuradór Jerál kona-ba akuzasaun formál hasoru RD iha Setembru 2020, vítima balu mai husu tan apoiu husi JU,S.
Bazeia ba padraun étiku nebe a’as hosi JU,S nia advogadu, molok konkorda atu reprezenta vítima iha krime ida, JU,S tenke analiza uluk karik iha ka la’e risku husi vítima komete krime “denúncia caluniosa” ka krime deklarasaun falsu ba autoridade judisiáriu. Ho nune’e, JU,S nia serbisu preliminár tenke inklui verifikasaun faktus sira atu nune’e bele iha serteza katak kazu ne’ebé JU,S atu fó asisténsia iha lejitimidade duni.
Relasiona ho kazu RD, hafoin simu tiha pedidu husi vítima ida, JU,S halo sorumutu ho reprezentante balun husi Igreja iha Timor-Leste, PNTL, PCIC, MSSI, no doadór husi Topu Honis atu verifika karik kazu ne’e lejítimu ka lae. Husi sorumutu sira ne’é, JU,S konklui katak kazu ne’é lejitimu duni, inklui tanba rejistu ona iha autoridade polisiál no mós tanba iha ona konfisaun hosi RD rasik ba Igreja. Ho nune’e JU,S deside atu reprezenta kliente ida-ne’e, no formaliza relasaun liuhosi asina prokurasaun.
JU,S nia serbisu reprezenta vítima tenke tuir nafatin vítima nia konsentimentu. Tuir Lei kontra Violénsia Doméstika vítima tenke fó ninia konsentimentu atu reprezentante legál bele foti asaun saida de’it, inklui atu lori ba presta deklarasaun iha Ministériu Públiku, hetan asisténsia psikososiál, hetan asisténsia médika no seluk ne’ebé presiza ka nesesáriu.
JU,S nia asisténsia ba vítima iha kazu refere bazeia ba nia natureza sosiál, katak, fó asistensia gratuita. Vítima nia família balun mak ho voluntáriu fó sasan ruma hanesan manu moris, ai-fuan, tais no batar-da’an ba JU,S nu’udar agradesimentu ba ninia serbisu. Haree katak vítima ka kliente mós barak tan no tempu naruuk ona (tinan 2.5), ema balun mós hakarak fó doasaun hodi apoia JU,S nia serbisu sosiál, inklui ba kazu ida-ne’e.
“Hahú hosi Janeiru 2019 to’o Juñu 2021, JU,S simu doasaun besik USD 15.000 (inklui USD 2.460 hosi GoFundMe). Doasaun sira ne’e uza ba kazu Topu-Honis hodi kobre kustu viajen ba Oecusse (viajen totál ba dala 11 to’o agora), inklui ai-hán no akomodasaun ba vítima sira no kustu viajen ba JU,S nia funsionáriu”.
