Kuadru avizu projetu Notariadu Ambeno laiha ona

Kuadeu avizu ba projetu notariadu iha Santa Rosa, Oe-Kusi Ambeno ema balun lees sai tiha ona. Foto The Oe-Kusi Post/Jefriano Oqui.

SANTA ROSA (TOP) – Kuadru avizu ne’ebé kontein informasaun sira kona-ba projetu konstrusaun moru foun no rehabilitasaun no extensaun sala sira ba gabinete sekretariadu rejionál ba ordenamentu teritóriu no kadastru iha Oe-Kusi Ambeno laiha ona, tanba deskonfia ema ‘balun’ lees sai tiha ona ho rajaun la klaru.

The Oe-Kusi Post (TOP) observa direita ba projetu ne’ebé lokaliza iha Santa Rosa, Oe-Kusi Ambeno katak, tuir loloos projetu kona-ba ‘konstrusaun moru foun no rehabilitasaun no extensaun sala sira ba gabinete sekretariadu rejionál ba ordenamentu teritóriu no kadastru tenke remata ona iha fulan Outubru 2018, infelizmente to’o ohin loron tama ona fulan Juñu 2020 mós projetu ne’e seidauk remata ho rajaun la klaru.

Hafoin The Oe-Kusi Post hatun notisia kona-ba Eke Sequeira abandona projetu Notariadu Ambenoiha loron Tersa 23 Juñu 2020 oras dadersan, no liu de’it tempu balun, kuadru avizu ne’ebé kontein informasaun sira kona-ba projetu ne’e laiha tiha ona ho rajaun la klaru. Akontesimentu ne’e kuaje atu hanesan ho projetu konstrusaun edifisiu administrasaun RAEOA nian ne’ebé The Oe-Kusi Post hatun notisia kona-ba Konstrusaun edifisiu administrasaun RAEOA abandonadu iha loron 1 Abril liuba, no iha loron tuir mai kedas akontese Kuadru Avizu Administrasaun RAEOA Nakles Fahe Rua, tuir fali Kuadru Avizu Edifisiu Administrasaun RAEOA Laiha Ona, no ikus mai Kuadru avisu edifisiu administrasaun RAEOA monta fali ona.

Maibé, ba projetu ho númeru kontratu 15-RAEOA-ZEESM-TL/VII/2018 nia nain mak RAEOA, kontrator mak Grand Enclave Unipessoal Lda, no nia konsultan mak Niceles Consultant Engineering Lda. Projetu ne’e hahu ona iha loron 4 Jullu 2018 ho nia durasaun fulan tolu, katak to’o fulan Outubru tinan 2018 projetu ne’e tenke remata, maibé realidade hatudu to’o oras ne’e seidauk hotu hela de’it. Projetu ne’e ho nia valor kontratu mak US$ 93,493.12.

The Oe-Kusi Post tenta ona halo konfirmasaun ho nain ba empreza Grand Enclave Unipessoal Lda, maibé lahetan komentariu.

Jefriano Oqui
Author: Jefriano OquiEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE