Eke Sequeira abandona projetu Notariadu Ambeno

SANTA ROSA (TOP) – Nain ba kompañia Grand Enclave Unipessoal Lda, Bartolomeo Rakama Eke Sequeira abandona tiha projetu fiziku kona-ba rehabilitasaun edifisiu Rejistu Sivil Notariadu Oe-Kusi Ambeno.

The Oe-Kusi Post (TOP) observa direita ba projetu ne’ebé lokaliza iha Santa Rosa, Oe-Kusi Ambeno katak, tuir loloos projetu kona-ba ‘konstrusaun moru foun no rehabilitasaun no extensaun sala sira ba gabinete sekretariadu rejionál ba ordenamentu teritóriu no kadastru tenke remata ona iha fulan Outubru 2018, infelizmente to’o ohin loron tama ona fulan Juñu 2020 mós projetu ne’e seidauk remata ho rajaun la klaru. 

Bartolomeo Rakama Eke Sequeira uja hela faru FRETILIN iha momentu kampaña partidu FRETILIN nian. Foto Espesial.

Projetu ho númeru kontratu 15-RAEOA-ZEESM-TL/VII/2018 nia nain mak RAEOA, kontrator mak Grand Enclave Unipessoal Lda, no nia konsultan mak Niceles Consultant Engineering Lda. Projetu ne’e hahu ona iha loron 4 Jullu 2018 ho nia durasaun fulan tolu, katak to’o fulan Outubru tinan 2018 projetu ne’e tenke remata, maibé realidade hatudu to’o oras ne’e seidauk hotu hela de’it. Projetu ne’e ho nia valor kontratu mak US$ 93,493.12.

Ho problema ne’e, Diretór Natariadu Rejiaun Administrativa Espesial Oe-Kusi Ambeno (RAEOA), José Ase Neno Colo katak, inisiu halo Bill of Quantity (BoQ) ba projetu ne’e notariadu la involve iha prosesu nia laran, maibé tuir kuadru avisu ne’ebé kompañia tau iha obra nia oin katak kontratu ba obra ne’e sira fó ba kompañia manan nain ne’e tenki finalize iha fulan 3 nia laran.

Diretór Natariadu Rejiaun Administrativa Espesial Oe-Kusi Ambeno (RAEOA), José Ase Neno Colo. Foto The Oe-Kusi Post/Abilio Elo Nini.  

“Projetu ne’e hahu iha tinan 2018, maibé realidade to’o agora seiduk hotu hela de’it, entaun obras públika tenki fó xamada atensaun ka klarifikasaun razaun saida mak obra ne’e sedauk finaliza,” kestiona diretor notariadu ne’e ba The Oe-Kusi Post iha nia serbisu fatin, Santa Rosa, Oe-Kusi Ambeno Segunda 22 Juñu 2020.

“Tuir loloos kompañia viola ona kontratu, governu autoridade tenki fó ona sansaun tanba ne’e prezudika ami nia servisu atendimentu públiku iha rejistu sivil tanba durante ne’e ita serbisu espasu laiha atu halo atendimentu ho dignu,” esplika diretó José Neno.

Nia fó solusaun katak, se kompañia la toma responsabilidade ba nia obra ne’e governu tenki foti asaun ruma ka entrega ba kompañia seluk atu kontinua obra ne’e tanba halo servisu uza osan Estadu nian tenki garante kualidade serbisu no mós termu kontratu nian.

“Ami hanesan uza nain ba projetu ne’e ami husu ba autoridade tenki halo lalais, haka’as kompañia ne’e para tenki finaliza lalais obra ne’e, tanba tuir regras ne’e viola ona kontratu. Kontratu dehan fulan 3 de’it, maibé liu tiha ona fulan 3 to’o agora seidauk hotu hela de’it. Ami lamenta teb-tebes tanba demora kleur liu, agora sira foin tama serbisu durante Estadu emerjénsia sira feriadu karik, maibé projetu ne’e tuir loloos hotu ona iha tinan kotuk liuba,” nia lamenta.

Hatan kona-ba ezijensia ne’e, Diretór Obras Públika RAEOA, Candido dos Reis Amaral hateten, “razaun kritériu kompañia tenki aprezenta tanba saida mak atraza, diresaun infraestrutura hakerek ona karta ba obra nain atu husu ba kompañia nain nia tenki justifika tanba saida mak sedauk finaliza,” hateten diretór Candido ba The Oe-Kusi Post iha edifisiu Prezidente Autoridade nia oin, Oe-Bau, Oe-Kusi Ambeno, Segunda 22 Juñu 2020.

“Sira serbisu hela, maibé sira tenki halo karta justifikasaun aprezenta ba iha Prezidenti Autoridade kona-ba sira nia atrazamentu ne’e,” hateten Candido amaral.

Dirétor Candido mós fó klarifikasaun balun katak rajaun ida, tanba iha tinan hirak ba kotuk nain ba empreza Grand Enclave, Eke Sequeira moras todan no baixa kleur iha hospital ida iha Indonézia, maibé tuir dalan legal governu lahatene tuir kona dezastre ne’e, tanba osan Estadu tenki halo obra ruma ho responsabilidade

“Tanba ita hatene tinan hirak liu ba kompania ne’e hasoru problema diretór moras, maibé buat sira ne’e kestaun umanu, kontratu lakolia ida ne’e, ne’ebé ami hein de’it bainhira mak empreza ne’e atu hato’o karta justifikasaun kona-ba atraza,” diretór Candido esplika.

Nia hatutan, projetu ne’e teknikamente seidauk to’o pur sentu ualu nulu (80%), no diresaun infraestrutura kontinua konfirma bebeik ho empreza nain atu toma responsabilidade.

“Neste momento hakarak ka lakohi sira tenki halo hotu obra ne’e, ami hein hela nia justifikasaun, tanba Estadu presija eskritóriu ne’e. Agora ita kestiona mak nia atraza ne’e de’it, maibé ne’e obrigasaun ninian atu halo hotu servis,” diretór Candido kestiona.

Bartolomeo Rakama Eke Sequeira uja hela faru partidu CNRT iha momentu kampaña partidu CNRT nian. Foto Espesial.

Hafoin ida ne’e, The Oe-Kusi Post kontaktu kedas via telemovél dala tolu tutuir malu ba nain kompañia Grand Enclave Unipessoal Lda, Bartolomeo Rakama Eke Sequeira, maibé la atende. Tanba la atende kontaktu ne’e, The Oe-Kusi Post mós kontinua hakat kedas ba nain ba kompañia ne’e nia uma, infelizmente kontinua lahetan resposta ka komentariu ruma kona-ba assuntu ne’e.

Jefriano Oqui
Author: Jefriano OquiEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE