MAKELAB (TOP) – Pasiente moras lepra sira iha aldeia Makelab ne’ebé partense ba suku Tai-Boko iha Oe-Kusi Ambeno oras ne’e sente kaman itoan hafoin hetan apoiu umanitáriu balun husi kompañia lokal Irmão Timor Unipesoal, Lda.
Empreza Irmão Timor ne’ebé koopera ho Misaun Lepra (Leprosy Mission) iha Oe-Kusi Ambeno molok fahe apiu umanitáriu sira hanesan nesesidade báziku, sira halo uluk identifikasaun ba ema hirak ne’e mak foin fahe apoiu hirak ne’e.
Apoiu nesesidade báziku sira ne’e mak hanesan iha foos saku 50, masin midar, Supermie, no seluk tan ne’ebé la’ós fahe de’it ba ema ho moras lepra, maibé fahe mós ba familai kbi’it la’ek balun, inklui ema ho difisiente sira.
Diretór Kompañia Irmão Timor Unipessoal, Lda, Julio Mak rekoñese katak durante periodu Estadu emerjénsia, ema hirak ne’e susar tebes atu buka osan no buka ai-han hodi sustenta sira nia moris lorloron.
“Tanba ne’e mak ha’u nia intensaun hakarak ajuda sira, tanba situasaun Estadu emerjénsia tama ba daruak ona, sira susar tebes atu buka osan hodi sosa hahan,” hateten Julio Mak ba jornalista sira iha aldeia Makelab, suku Tai-Boko, Oe-Kusi Ambeno, Sábadu 9 Maiu 2020.
“Ha’u ajuda sira ho laran luak no hakarak ajuda kbi’it la’ek sira,” afirma Julio.
Nia hatutan, apoiu ne’e ba sira ne’ebé presija tebes liliu sira ne’ebé ho moras difisiente, moras lepra no sira ne’ebé laiha ona forsa hodi halo to’os.
“Tinan ne’e komunidade barak mak falla koeleta, tanba impaktu udan been menus. Nune’e, ami hakarak ajuda ita nia inan-aman sira ne’e ho total uma kain 100. Ida ne’e foin mak primeiru no ba oin ami sei identifika tan iha suku seluk,” Julio promete.
Iha fatin hanesan, Koordenador Misaun Lepra Timor-Leste, Domingos da Silva hato’o agradese ba kompañia Irmão Timor, tanba bele iha hanoin di’ak ba komunidade sira atu hetan apoiu iha situasaun Estadu emerjénsia ne’e.
Nune’e mós Xefe aldeia Makelab, Domingos anin agradese tebes tulun sira husi empreza Irmão Timor ne’ebé pelu-menus ajuda ona kbi’it la’ek sira iha nia aldeia laran.
Iha parte seluk, Banco Nacional de Comércio de Timor-Leste (BNCTL) sukursal Oe-Kusi Ambeno mós fahe nesesidade báziku sira ba uma kain hamutuk 32, balun iha Makelab (Suku Tai-Boko), no balun iha Oe-Nunuh (Suku Suni-Ufe).
Koordenador BNCTL Sukursal Oe-Kusi Ambeno, Eusman de Souza hateten, situasaun Estadu emerjénsia komunidade barak mak preokupa no triste tanba laiha tempu buka osan no ai-han, tanba ne’e BNCTL Ambeno hetan orientasaun husi BNCTL nasionál katak presija fó netik apoiu umanitáriu balun ba kbi’it la’ek sira.
“Tanba ne’e mak ami hare husi banku identifika rasik ba sira ne’ebé merese duni atu simu ajudus sira ne’e, tanba ajuda la’ós buat barak ida, ne’ebé ohin ami la’o husi Makelab, Oe-Nunuh to’o Bona hodi fó netik asaun karidade ne’e ba iha kbi’it la’ek sira,” nia esplika.
Martinho Auni nu’udar kbi’it la’ek husi suku Suni-Ufe agradese tebes ba asaun karidade husi BNCTL.
Antes ne’e mós ekipa gabinete Prezidente Autoridade ba Rejiaun Administrativu Espesial Oe-Kusi Ambeno fahe ona apoiu balun ba kbi’it la’ek sira iha Oe-Kusi Ambeno, maibé oras ne’e kontinua fahe tan ba Ambeno oan sira ne’ebé hela iha Dili, liliu ba estudante sira.
