Oekusipost.com Numbei – Uma kain hamutuk 19.839 iha Oe-Kusi Ambeno oras ne’e "hein hela" subsidiu osan $100 husi governu inklui apoiu umanitariu sira, infelizmente governu oras ne’e sei kontinua estuda hela no halo verifikasaun ba dadus ne’ebé seidauk hotu hela de’it.
Serbisu Administrasaun Estatal iha Rejiaun Administrativu Espesial Oe-Kusi Ambeno (RAEOA) durante ne’e maske governu sentral bandu no desidi hapara atividade rekoella dadus rejistu uma kain, maibé sira la’o nafatin hodi oras ne’e kompleta ona, maibé promesa midar governu nian mak seidauk to’o sira nia liman-laran.
Diretór Administrasaun Estatal RAEOA, José António Soares Martins katak, total uma kain hira ne’e mai husi suku 18, no aldeia 63 iha rai-ketan Oe-Kusi Ambeno ne’ebé kompleta ona no haruka ona ba Estatal nasionál hodi hetan subsidiu osan $100 inklui apoiu umanitária ba nesesidade báziku sira.
“Oe-Kusi Ambeno nian kompletu ona. Dadus ne’e ohin tenke haruka kedas ba nasionál para husi Estatal haruka ba Ministériu Solidaridade Sosial no Inkluzaun (MSSI),” hateten José António Soares Martins “José Camada” ba Oe-Kusi Post iha nia serbisu fatin, Numbei, Oe-Kusi Ambeno, Kinta 7 Maiu 2020.
Oe-Kusi Ambeno ne’ebé iha postu 4, suku 18, no aldeia 63 ne’e postu villa ka postu Pante Macassar mak iha populasaun barak liu ho total uma kain 10.820, tuir kedas postu Nitibe ho uma kain 3.644, postu Oe-Silo kompostu husi uma kain 3.310, no ikus liu mak postu Pasabe (Abani) ho nia total uma kain 2.065.
Nia hatutan, durante prosesu rejista fixa familia, laiha orientasaun ba autoridade lokal sira atu halo kobaransa, no maske lei autoridade lokal Númeru 8/2016 ne’ebé sai iha 8 Julho 2016 fó dalan ba autoridade lokal sira hodi kobra osan, maibé balun halo no balun la halo.
“Maibé, ha’u lakohi para ho kobransa ne’e, iha maibé ha’u lakohi mensiona nia total. Se nia hanoin fó atu kontribui, ne’e kontribuisaun ba suku nian, maibé atu husu labele hanesan bainhra xefe suku ho aldeia sira ba rejistu sira la husu, maibé atu fó hanesan kontribui ne’e bele hela maske lei suku nian fó autorizasaun atu kobra,” José Camada esplika.
Iha parte seluk, xefe suku Lalisuk, Hermelindo Lalisuk husu ba governu atu tenke implementa promesa sir aba subsidiu familiar no apoiu umanitáriu, tanba povu hein hela iha baze.
Entretantu, durante semana hirak ba kotuk ekipa Prezidente Autoridade RAEOA hahu fahe ona nesesidade báziku balun ba familia kbi’it la’ek sira iha Oe-Kusi Ambeno, no oras ne’e kontinua fahe ba Ambeno oan sira liliu estudante sira ne’ebé hela iha Dili.
Tuir observasaun Oe-Kusi Post katak, prosesu implementasaun subsidiu osan no subsidiu sira seluk oras ne’e seidauk bele realiza, tanba akontese sistema dudu malu to’o dada malu entre MSSI ho Ministériu Administrasaun Estatal (MAE). Ministériu Solidaridade Sosial no Inkluzaun (MSSI) dehan tuir loloos implementa ona promesa governu nian, maibé sei hein verifikasaun dadus familiar ne’ebé responsabiliza husi MAE, no MAE rasik dehan ona dadus ne’e kompleta ona, hein de’it atu submete ba MSSI iha tempu badak, maibé povu iha baze hein kuaje fulan rua resin ona promesa ne’e seidauk akontese hela de’it.
