Oekusipost.com Ambeno – Autoridade Rejiaun Administrativu Espesial Oe-Kusi Ambeno halo ona dezifektasaun ba dalan protokolu sira husi Sakato (fronteira ho Wini) ba to’o eis merkadu Tono ho objetivu atu prevene moras virus corona (COVID-19).
Ekipa prevensaun ne’e hetan apoiu husi kompañia PAX Cleaning Service, Bombeiros, CVTL no PNTL hodi realiza serbisu ida ne’e ho susesu.
Diretór Saúde interino RAEOA, Luis de Jesus Neno katak, objetivu rega estrada protokolu sira ne’e atu hamate virus corona karik akontese liu husi vizitante seluk.
“Atividade ne’e nia objetivu maka atu prevene komunidade liu-liu kona-ba virus corona ne’ebé agora dadauk tama ona iha ita-nia rain, tanba prevensaun covid-19 RAEOA nian halo prevensaun ho dezinfekta ne’e,” hateten Luis Neno ba jornalista sira iha Oe-Kusi Ambeno.
Iha fatin hanesan Xefe Gabinete Prezidenti Autoridade ba RAEOA Agustinho Caet hateten, atividade ne’e sei kontinua to’o sub-rejional sira.
“Ita sei to’o sub-rejiaun sira hanesan Oe-Silo iha ne’eba mós ita nia ema sira tama maka’as husi ne’eba. No mós sub-rejiaun Nitibe fronteira Citrana ho Pasabe nian,” esplika Caet.
Entretantu, ekipa COVID-19 Oe-Kusi Ambeno foin lalais deklara, sei iha ema hamutuk 17 mak oras ne’e sei kumpre hela loron 14 iha sentru akollimentu Hotel Fitun Lima.
