Oekusipost.com Ambeno – Prezidente Autoridade (PA) ba Rejiaun Administrativu Espesial Oe-Kusi Ambeno (RAEOA), José Luis Guterres promete sei fahe foos ba povu sira iha Ambeno iha periodu Estadu emerjénsia ne’e.
Lugu rekoñese, durante fulan ida nia laran, povu Ambeno balun halerik ba ai-han, tanba impaktu husi Estadu emerjénsia ne’e. Tanba ne’e, tuir Lugu katak Autoridade sei buka meius hodi informa ona ba Ministériu Koordenador ba assuntu Ekonómiku hodi rezerva kedas povu Oe-Kusi Ambeno nia foos.
“I ta akompaña hela informasaun balun mai husi Konsellu Ministru sira, no mós informasaun mai husi Ministru Fidelis. Ne’ebé ne’e hanesan prosesu ida osan Estadu nian ne’e ita bele aprova ona, maibé tenke hare atu aplika ne’e oinsa, ne’ebé buat ne’e lori tempu,” hateten Lugu ba Oe-Kusi Post iha Oe-Kusi Ambeno, Sesta 24 Abril 2020.
Nia esplika, iha Estadu emerjénsia difikuldade barak mak povu enfrenta liliu rezerva ai-han, tanba ne’e Autoridade haruka ona karta ba Ministériu Soslidade Sosial no Inkluzaun (MSSI), no mós ba Ministru Fidelis, rezultadu positivu ona atu distribui foos ba povu Oe-Kusi Ambeno iha tempu badak.
“Ami hanesan preve situasaun difikuldade ida ne’e, ne’ebé ami adianta para ko’alia uluk ho Ministra Solidariedade Sosial, depois ami hakerek karta ba Ministru Fidelis para bele disponibiliza husi nasionál atu haruka rezerva foos mai ita nia rain Oe-Kusi Ambeno. Ne’ebé ami hatene tiha ona katak iha desijaun positivu favorável, ne’ebé ha’u hanoin iha tempu badak ita sei iha reforsu ba foos ne’ebé iha,” Lugu esplika.
