Oekusipost.com Ambeno – Prezidenti Autoridade Rejiaun Administrativu Espesial Oe-Kusi Ambeno (RAEOA) no Zona Ekonomia Espesial Sosial no Merkadu Timor leste (ZEESM-TL), José Luis Guteres “Lugu” hakarak jestaun Orsamentu Jeral Estadu (OJE) nian ne’ebé implementa iha rai-ketan ne’e tenke nakloke ba públiku.
Ho razaun tranparênsia, Lugu hakarak povu iha direitu atu asesu gastus orsamentu Estadu nian nu’udar partisipasaun ba dezenvolvimentu.
“Ami nia hakarak ne’e jestaun orsamentu tenke tranparênsia, maibé ita agora laiha Free balance nee atu asesu, entaun ita atu minimiza buat ne’e ita bele hasai dalarua tinan ida ita sei konvida ita nia autoridade sira mai hotu,” hatete Lugu bainhira hala’o vizita servisu iha saúde sentral Oe-Kusi Ambeno semana kotuk.
Nia planeia sei konvida kada autoridade lokal sira iha Ambeno hodi halo enkontru ho sira atu esplika osan ne’ebe ba sira, no osan ne’e uja ba saida no osan ne’e sulin ba ne’ebé. Enkontru ne’e mós husu mós sira nia hanoin kona-bá saida mak sira nia hakarak ba autoridade atu halo.
“Ne’e para ita bele iha hanesan partisipasaun povo Oe-Kusi Ambeno nian ba iha jestaun orsamentu Estadu. Ida ne’e mak ami hakarak halo hanesan prátika ida para ema hotu akompaña,”Lugu promete.
“Prioridade ba komunidade sira kala ema sa’e aviaun, maibé pelu-menus bee moos ba sira nia uma ne’e importante, buat sira ne’e ita hakarak halo dezenvolvimentu povo bele partisipa, povo bele benefisia ita tenki halo sira atu asesu ba prosesu dezenolvimentu ne’e,” Lugu esplika.
Iha vizita ne’e mós Prezidente Lugu kongratula no fó agradese ba ekipa serbisu saúde rejional sira liliu ba ekipa prevensaun COVID-19 iha rejiaun Oe-Kusi Ambeno, tanba tama ona fulan ida progresu serbisu iha rai -etan ne’e la’o di’ak tebes.
