Oekusipost.com Palaban – Munisipiu Dili rezista duni númeru kazu positivu ba moras virus corona (COVID-19) kuaje nain 20 resin ona, maibé progresu iha Rejiaun Administrativu Espesial Oe-Kusi Ambeno iha posibilidade boot atu livre ona husi virus ne’e rasik.
Ema hamutuk nain 29 ne’ebé antes ne’e sai suspeitu ba moras COVID-19 iha rai-ketan ne’e, rezultadu teste laboratóriu hatudu ona negativu
Responsavél médiku ba sentru akoollimentu sira iha Ambeno, dotór Tito Baptista Anuno hateten, suspeitu hamutuk ema nain 29 ne’ebé antes ne’e deskonfia hatudu sintomas, oras ne’e rezultadu teste laboratóriu hatudu negativu, katak Ambeno iha posibilidade atu livre ona husi moras COVID-19 maske sei iha ema nain 19 mak oras ne’e sei kumpri hela kuarentena obrigatóriu iha sentru akollimentu hotel fitun lima iha Oel-Upun.
“Sira ne’e mak durante ne’e ami halo teste hetan apoiu tékniku husi laboratóriu nasionál ami hetan suspeitu nain 29, mane nain 16 no feto nain 13, sira-nia rezultadu husi teste ne’e negativu ona,” hatete dotór Anuno ba Oe-Kusi Post iha salaun Alfandega Palaban, Oe-Kusi Ambeno, Segunda 27 Abril 2020.
Dotór ne’e mós esplika, hahu husi loron 23 Marsu liuba, númeru pasiente ema tama iha sentru akollimentu 3 hanesan Hotel Lifau, Hotel Fitun Lima, no rezidiensia Fulolo hamutuk ema nain 154. Husi total ne’e iha estudante nain 69, funsionáriu públiku nain 4, traballador iha empreza privadu hamutuk nain 51, dona de casa hamutuk nain 13, sekuriti nain 2, cleaner service nain 1, labarik nain 12, no kontratadu husi Indonézia hamutuk nain 2.
“Iha Hotel-Lifau mane nain 23 feto nain 19 hamutuk nain 42. Hotel Oel-upun iha mane 47 feto nain 28, total nain 75. No, iha rezidensia Fulolo iha mane nain 29, no feto nain 8, total nain 37. Husi fatin tolu ne’e, iha mane nain 94 no feto nain 55, hamutuk ema nain 154,”nia esplika.
Nia hatutan, sira ne’ebé mak kumpri ona kuarentena obrigatóriu no kontinua auto-konfinamentu ka auto-kuarentena hamutuk nain 137 ne’ebé iha mane nain 82, no feto nain 55.
“Husi total ema nain 154, oras ne’e sei iha ema nain 17 mak kontinua kumpri loron 14 iha sentru akollimentu hotel fitun lima iha Oel-Upun,” nia esplika.
Husi ema nain 17 ne’e, mane hamutuk nain 16, no feto ida.
Dotór Anuno mós agradese ba serbisu hamutuk entre ekipa sira durante ne’e, tanba tuir nia katak, husi rezultadu serbisu hamutuk ne’e mak oras ne’e Ambeno iha progresu positivu, tanba númeru ema iha sentru akollimentu sira hahu menus dadauk ona.
Entretantu, Adjuntu Segundu Komandante Polisia Nasionál Timor-Leste ba RAEOA, Paulino do Carmo Pereira katak, komandu jeral hatun orden ba seguransa atu kontinua halo prevensaun ba distansia sosial.
